Kayat ti kaaduan a Filipino a sungbatan ni Bise Presidente Sara Duterte dagiti kasona iti impeachment, segun iti Second Quarter 2025 Social Weather Stations (SWS) a surbey a naangay manipud Hunio 25 agingga iti 29.
Kinompirmar daytoy ti SWS idi Hulio 15.
Maibatay iti surbey nga insayangkat ti Stratbase Group, 66 a porsiento dagiti respondent ti immanamong iti sinao ni Duterte a masapul a sanguenna dagiti kasona iti impeachment "tapno masungbatanna amin nga alegasion kontra kenkuana a mainaig iti panagkunniber."
Saan nga immanamong ti 19 a porsiento, idinto nga adda 15 a posiento ti nagkuna a saanda a sigurado.
Kasapulan ti natibker ken nainkalintegan a pagtaktakderan iti parikut iti WPS --NMC
Naggapu iti Metro Manila ti kaaduan a nangsuportar iti panangsango ni Duterte iti kasona iti impeachment, nga addaan iti 76 a porsiento, sumaruno ti Balance Luzon (69 a porsiento), ken ti Visayas (67 a porsiento).
Iti Mindanao, a baluarte ni Duterte, ti kababaan ti bilang dagiti immanamong (55 a porsiento).
Iti socioeconomic class, kaaduan nga umanamong ti aggapu iti Class ABC (73 a porsiento), a sarunuen ti Class D (66 a porsiento), ken Class E (62 a porsiento).
Naisayangkat ti surbey babaen ti rupanrupa a panagsaludsod kadagiti 1,500 a nataengan a Filipino iti entero a pagilian, a pakabuklan ti 300 a respondent iti tunggal lugar kas iti Metro Manila, Balance Luzon, iti Visayas, ken iti Mindanao. (Ellalyn De Vera-Ruiz/Manila Bulletin//Lito Hilidon/Bannawag)
