Pinadayawan ni Presidente Marcos Jr. ti madama a pannakaibangon ti umuna a paset ti Metro Manila Subway Project (MMSP), a manamnama a mangkissay iti oras ti panagbiahe manipud Valenzuela agingga iti Ninoy Aquino International Airport (NAIA) manipud iti dua nga oras agingga iti 40 laeng a minuto inton mairingpas.
Daytoy ti kinuna ni Marcos ita nga aldaw, Hulio 16, bayat ti inwayatna nga inspeksion iti Camp Aguinaldo Station a pakaipatakderan ti MMSP.
Dinagadag ni Marcos dagiti maseknan nga ahensia a pardasanda a leppasen ti proyekto. Mangnamnama ti presidente a mairingpas ken maluktan ti paset ti Valenzuela inton 2028.
Segun ken Marcos, ti kadakkel ti proyekto ti mangipakita a kabaelan ti Filipinas ti mangipatungpal kadagit dakkel a proyekto para iti impraestruktura ti transportasion a buyogen ti tulong dagiti internasional a kabinnulig ti pagilian.
Kasapulan ti natibker ken nainkalintegan a pagtaktakderan iti parikut iti WPS --NMC
Mairugi ti umuna a Tunnel Boring Machine (TBM) CP103 iti Camp Aguinaldo Station nga agturong iti Ortigas Station kalpasan a maisilpo ti tunnel iti Barangay White Plains, Corinthian Properties, ken Meralco Compound.
Iti laksid ti agtultuloy a panagtrabaho dagiti maseknan nga ahensia, kinuna ti Malakanyang a saan pay a narugian dagiti paset ti usok gapu iti lima a tawenen a parikut iti right-of-way, nga isu ti mangitantan iti naintiempuan a pannakairingpas ti proyekto. (Argyll Cyrus Geducos/Manila Bulletin//Lito Hilidon/Bannawag)
