Pormal a kiniddaw dagiti abogado ni dati a presidente Rodrigo Duterte iti International Criminal Court (ICC) a mangangay iti “urgent status conference” sakbay ti naituding a summer recess itoy a Hulio 25, ta mabalin nga apektaran dagiti naitantan a proseso ti pagbanagan ti umasidegen a confirmation of charges hearing.
Iti indatag ni abogado ni Duterte a ni Nicholas Kaufman iti Pre-Trial Chamber I (PTC I) idi Hulio 14, dinagadagna ti korte a mangangay iti komperensia iti kabiitan a panawen, sakbay ti Hulio 25, tapno makitada dagiti kasayaatan nga aramidenda kadagiti bambanag a mainaig iti kaso.
Saan a naipalgak ti detalye ti kaso gapu ta confidential dagitoy.
Segun ken ni Kaufman, masapul a kitaen ti PTC I no kabaelanda pay a pagtalinaeden ti agdama nga iskediul ti confirmation of charges hearing, gapu kadagiti pannakaitantan a saan a ti depensa ti makagapu.
Kinuna ni Kaufman a ti pannakaitantan dagiti dokumento a kidkiddawenda ket mabalin a lapdanna ti idudur-as dagiti argumento ti depensa.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Maibatay iti Rule 121(2)(b) ti Rome Statute, mapalubosan ti Pre-Trial Chamber a mangangay iti status conference kadagiti banag a makaapektar iti naintiempuan ken nasayaat a pannakaaramid ti confirmation proceedings.
Maangay ti confirmation of charges hearing inton Septiembre 23, a mangikeddeng no rumbeng nga agtuloy ti kaso iti panangbista. (Raymund Antonio/Manila Bulletin//Lito Hilidon/Bannawag)
