Imbatad t Malakanyang nga awan pay naammuan no addan naipaulog nga arrest warrant kontra ken ni Senador Ronald Dela Rosa ken dadduma pay a nairaman iti pannakaipatungpal ti gubat kontra droga ni dati a presidente Rodrigo Duterte.
"Iti agdama, awan pay naawatmi nga ania man a komunikasion no addan warrant of arrest para kadagiti co-perpetrator ni dati a presidente Duterte," kinuna ni Palace Press Officer ken Communications Undersecretary Claire Castro ita a Huebes, Hulio 17.
Kinuna daytoy ni Castro kalpasan nga imbaga ni Executive Secretary Lucas Bersamin iti Kyodo News a mabalin nga arestaren ti Filipinas ni Dela Rosa, a nagserbi a hepe ti Philippine National Police bayat ti pannakaipatungpal ti drug war, no mangipaulog ti International Criminal Court (ICC) iti warrant mainaig iti adu ti napapatayna a kampania kontra droga ni Duterte.
Inarestar dagiti autoridad ti Filipinas ni Duterte idi Marso babaen ti arrest warrant nga impaulog ti ICC a naipatungpal babaen ti Interpol.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay saanen a kameng iti ICC ti gobierno ti Filipinas sipud pay idi 2019, idi nagikkat ni Duterte iti Rome Statute, obligasion ti administrasion ni Marcos iti Interpol nga agtignay no adda notice ti Interpol. (Betheena Unite/MB)
