Agdagupen iti 112,729,484 ti populasion ti Filipinas sipud idi Hulio 1, 2024, segun iti opisial a resulta ti 2024 Census of Population (POPCEN), nga indeklarar ni Presidente Ferdinand R. Marcos Jr. a kas opisial.
Impaulog ni Marcos ti Proclamation 973, a mangiturturong iti Philippine Statistics Authority (PSA), iti pannakitinnulong iti Presidential Communications Office (PCO), a mangiwaras iti datos ti populasion babaen ti probinsia, siudad/munisipalidad, ken barangay kadagiti amin a maseknan nga ahensia ken opisina ti gobierno.
Insayangkat ti PSA ti sensus manipud Hulio agingga iti Septiembre 2024, a nausar ti Hulio 1, 2024 a kas ti reperensia a petsa, segun ti proklamasion a pinirmaan ni Executive Secretary Lucas Bersamin idi Hulio 11.
Kinuna ti PSA a sakupen ti population count ti amin a 18 nga administrative region ken mairaman dagiti Filipino kadagiti embahada, konsulado, ken mision iti ballasiw-taaw.
Phivolcs: Bulkan Mayon, nagtalinaed nga aktibo
Ipakita ti 2024 a bilang ti panagngato a 3.69 a milion manipud iti 109.04 a milion a nairekord idi 2020.
Bimmaba ti tinawen a yaadu ti populasion agingga iti 0.80 a porsiento manipud 2020 agingga iti 2024, no idilig iti 1.63 a porsiento iti nagbaetan ti 2015 ken 2020.
Segun iti PSA, ti deceleration iti population growth ket mabalin a maigapu iti nababbaba a fertility ken birth rates, nangatngato a mortality kabayatan ti Covid-19 pandemic, ken bimmassit a migrasion. (Darryl Juan Esguerra/PNA)
