Ti resolusion iti Senado a mangkidkiddaw iti interim release ken pannaka-house arrest ni dati a presidente Rodrigo Duterte iti International Criminal Court (ICC) ti mangpaneknek iti ibagbaga dagiti pamilia dagiti biktima ti drug war nga adda pay laeng impluensia ni dati a presidente Rodrigo Duterte.
Daytoy ti kinuna ni Lanao del Sur 1st district Rep. Zia Alonto Adiong kas reaksionna iti resolusion nga impila dagiti pasurot ni Duterte iti Senado a da Senador Christopher Go, Ronald dela Rosa, ken Robinhood Padilla.
Nakaditene ni Duterte iti ICC iti The Hague, the Netherlands gapu iti kaso a crimes against humanity mainaig iti war on drugs nga insayangkatna idi presidente isuna.
Segun ken ni Adiong, dayta ti ikalkalintegan dagiti pamilia dagiti biktima ti extrajudicial killings iti ICC a gapu iti panangsupiatda iti interim release ni Duterte, nga iti kanito a makaruar daytoy, mabalinna latta nga usaren ti impluensiana a nalawag nga adda pay laeng agingga iti agdama.
Kasapulan ti natibker ken nainkalintegan a pagtaktakderan iti parikut iti WPS --NMC
Iti ababa a sao, "kampilan a dua ti tademna" ti resolusion nga impila dagiti pro-Duterte bloc iti Senado.
Kinuna ni Adiong a mabalin a makadadael ti nasao a resolusion iti tarigagayda a magun-od, ta pabilgen daytoy ti argumento ti pamilia dagiti biktima.
Segun kadagiti mangbabbabalaw iti administrasion ni Duterte, mapan a 30,000 a tao ti napapatay iti war on drugs. (Ellson Quismorio/Manila Bulletin//Lito Hilidon/Bannawag)
