Igangganetget ni Bicol Saro Party-list Rep. Terry Ridon ti pannakaisayangkat ti panagimbestigar ti Kamara maipapan iti epekto iti aglawlaw ti Manila Bay Rehabilitation Program a nangitunda iti pannakaaramid ti kontrobersial a Manila Baywalk Dolomite Beach.
Para iti daytoy a panggep, nangipila ni Ridon iti House Resolution (HR) No. 56, a nangidagadag iti House Committee on Public Accounts ken dadduma pay a maitutop a komite a mangisayangkat iti naan-anay nga imbestigasion, kas tulong iti lehislasion.
Ti panangipila ni Ridon ket ginubuay ti kinuna ti Metropolitan Manila Development Authority (MMDA), babaen ken ni MMDA Chairman a ni Don Artes, a direkta a makaigapu ti dolomite beach project iti agtultuloy a panaglayus iti Siudad ti Manila.
Naipadamag a ti proyekto ti pakaigapuan ti pannakabangen ti tallo a kangrunaan a ruaran ti danum--ti Faura, Remedios, ken Estero de San Antonio Abad--a pakapilitan ti danum ti tudo a maiturong iti maysa a sewerage treatment plant a di makabael a mangtaming iti kaadu ti danum ti layus bayat ti napigsa a tudo.
Kasapulan ti natibker ken nainkalintegan a pagtaktakderan iti parikut iti WPS --NMC
Naaramat ti puraw ti kolorna a darat a dolomite para iti pannakaaramid ti beach, coastal restoration, ken pannakapasayaat ti lugar ti Manila Baywalk bayat ti napalabas nga administrasion ni dati a presidente Rodrigo Duterte.
"Kinapudnona, ti proyekto a dolomite ket saan a paset ti inaprobaran ti NEDA (National Economic and Development Authority) a Manila Bay Rehabilitation Master Plan. Daytoy ket inadmitir iti publiko ti Department of Environment and Natural Resources (DENR) bayat ti deliberasion ti badiet ti kongreso idi 2020," kinuna ni Ridon iti maysa a statement.
"Gapu iti dayta, saan a pulos a naplano a mangsalaknib kadagiti coastal resources ti Manila Bay wenno manglapped iti coastal flooding, erosion, wenno polusion. maysa daytoy a kosmetiko a proyekto a nagmaskara a kas rehabilitasion, ken napaneknekan itan a makadangran kadagiti panagisayangkat a mangikabassit ti panaglayus iti Manila," napaliiwna.
"Daytoy (a proyekto) ket awan sabali no di maysa a nainkriminalan a pannakasayang ti pondo ti publiko--₱389 milion a mabalin koma nga adayo a nasaysayaat a nagastos para kadagiti sewerage treatment plant ken dadduma pay nga engineering interventions a naibatay iti siensia ken kinatalged," kinuna pay ni Ridon.
Kinuna pay ti kongresman a ti panagimbestigar ti Kongreso ti mangikeddeng iti kriminal ken administratibo a sungsungbatan, ken mapasungbat ti tunggal opisial ti gobierno a direkta a nairaman iti origination, planning, ken implementation ti artificial beach project.
"Daytoy ket maysa a proyekto nga awan iti master plan. Ket maysa itan a mapabasol iti kumarkaro a panaglayus iti mismo a kabesera ti pagilian. Kadagitoy a rason, sigurado nga adda maidarum iti graft," ingganetget ni Ridon, a maysa nga abogado. (Ellson Quismorio/MANILA BULLETIN)
