Kaso a kriminal ti impila ti Department of Education (DepEd) kontra kadagiti tattao a mapapati a nangsuitik iti Senior High School (SHS) Voucher Program.
Segun iti DepEd, nga idadauluan ni Secretary Sonny Angara, pormal nga indatagdan ti kaso a kriminal kadagiti tallo a suspek a nairaman kadagiti inuulbod nga aramid a mainaig iti SHS subsidy program ti gobierno.
Ti SHS Voucher Program ti maysa a kangrunaan a programa ti gobierno a mangipapaay iti pinansial a tulong kadagiti kualipikado a Grade 11 ken 12 nga estudiante iti pribado a pagadalan.
Kinuna ni Angara nga agtultuloy latta ti tarigagayda a mangdusa kadagiti nanglabsing iti programa uray asino man ti nairaman iti daytoy. Innayonna a ti di umisu a pannakausar ti kastoy a pondo ti mangapektar iti pannakaipaay iti de kalidad nga edukasion, nangruna kadagiti nakurapay nga agtutubo a Filipino. (Merlina Hernando-Malipot/Manila Bulletin//Lito Hilidon/Bannawag)
