Ad-adda a bimmaba ti pisos, iti ₱57, no maidilig iti doliar ti Estados Unidos (US) sipud idi Biernes itay napan a lawas gapu iti nangatngato nga implasion ti US.
Bimmaba ti pisos iti ₱57:$1 a lebel idi Mierkoles, Hulio 17, a nagserra iti ₱57.085 manipud iti ₱56.73 idi Martes, Hulio 15. Ti kapigsa ti pisos idi Mierkoles ti kababaan iti nasurok a tallo a lawas sipud iti Hunio 24 a lebel a ₱57.16:$1.
Segun ken ni RCBC Chief Economist Michael Ricafort, ti ikakapuy ti pisos ket mainaig iti ipipigsa ti doliar ti US kontra kadagiti kangrunaan a sangalubongan a kuarta a tinignay ti pannakairuar ti US Consumer Price Index (CPI) data para iti Hunio 2025, a nangipakita iti implasion a 2.7 a porsiento iti tinawen, ti kapartakan iti uppat a bulan sipud idi Pebrero 2025.
Kinuna pay ni Ricafort a mainaig pay iti panagbaba ti pisos dagiti pakaseknan iti pangta ni Presidente Donald Trump iti nangatngato a taripa ti panagangkat ti US, a mabalin a mangiturong iti panagngato ti implasion ti US ken mabalin a mangpaginad iti masanguanan a pannakakissay ti rate ti US Federal Reserve. (Derco Rosal/MANILA BULLETIN)
