Indagadag ni Senador Raffy Tulfo kadagiti celebrity ken social media influencer nga isardengda ti mangyendorso kadagiti online gambling platform para iti pagimbagan ti kagimongan ken utobenda dagiti social consequence dagiti endorsement-da.
Kinuna ni Tulfo a dagitoy a celebrity endorsers ken influencers, rumbeng nga agpanunot iti mamindua itan sakbay a gundawayanda ti kinalatak dagiti online gambling platform bayat nga ipapatin ti gobierno ti panangpasardengna kadagiti illegal betting operation.
Nupay mabalin a kunaen a ti dadduma kadagitoy a panangyendorso ket kas simple pakateggedan, namakdaar ti senador a dagiti kastoy nga endorso ket awan duadua a mangpakaro laeng iti pannakailuod iti panagsugal, uray kadagiti mismo a follower wenno patpatgenda iti biag.
“Mabalin a trabaho laeng para kadakuada, awan pinnersonalan. Ngem ti dida ammo, adu a tattao ti madadael gapu iti daytoy,” kinuna ni Tulfo iti maysa a press briefing.
Barko a RORO nga addaan nasurok a 300 a pasahero, limned iti Basilan
“Asino ti makaammo? Mabalin a naadiken dagiti kabagianda, dagiti ay-ayatenda, iti sugal a yen-endorsoda iti social media, TV, wenno radio,” innayonna.
Inruar ti senador ti pakdaar kalpasan ti kaudian a direktiba manipud iti Cybercrime Investigation and Coordinating Center (CICC), a nangballaag kadagiti influencer kontra iti panangitandudo kadagiti awanan lisensia nga online gambling platform.
“Panunotenda koma ti epekto (ti sugal) kadagiti follower-da. Amangan no iti kamaudianan, imbes a naragsakda, panawanda ida ket isardengdan ti mang-follow kadakuada. Amangan no ibagadanto pay ketdi, ‘Gapu kenka, nabangkrapak. Nadadael ti biagko,” kinuna pay ni Tulfo.
Segun iti CICC, agarup 80 a porsiento kadagiti top-tier content creator ti nangikkaten kadagiti paskilda a mainaig iti panagsugal, ngem saan pay a nagtungpal ti nabati a 20 a porsiento.
Tapno masigurado ti panagtungpal, kinuna ti CICC a makikoordinarda kadagiti kangrunaan a social media platform tapno maikkat dagiti account dagiti agtultuloy nga aglabsing.
Kinuna ti cybercrime arm ti Department of Information and Communications Technology (DICT) nga imbestigarenda met ti 13 a high-profile influencers nga addaan iti napagtitipon a 43 a milion a followers. Segun iti report, 50 agingga iti 60 a porsiento ti matgedan dagitoy nga influencer ket manipud kadagiti yen-endorsoda a gambling sites. Nupay kasta, adu kadakuada ti agop-operasion nga awanan ti umisu a lisensia wenno safety protocol. (Hannah L. Torregoza/MANILA BULLETIN)
