Naipan iti Tropical Cyclone Wind Signal (TCWS) No. 1 dagiti siam a lugar iti Luzon ita nga aldaw, Hulio 17, bayat a nagtalinaed ti pigsa ti tropical depression a napanaganan iti “Crising” iti panagturongna iti laud-amianan a laud iti Philippine Sea.
Segun iti Philippine Atmospheric, Geophysical and Astronomical Services Administration (PAGASA), nasaripatpatanda ti sentro ni Crising iti 535 a kilometro ti Juban, Sorsogon.
Agpigsa ti angin ni Crising iti 55 a kilometro tunggal oras iti asideg ti sentrona ken pugso nga agingga iti 70 a kilometro tunggal oras. Agpalaud-amianan a laud iti kapardas a 15 a kilometro tunggal oras.
Naipan iti Signal No. 1 ti Cagayan (agraman ti Babuyan Islands), Isabela, Apayao, Quirino, Kalinga, Northeastern Aurora (Dilasag, Casiguran, Dinalungan, Dipaculao), Eastern Mountain Province (Sadanga, Barlig, Paracelis, Natonin), Eastern Ifugao (Alfonso Lista, Aguinaldo, Mayoyao, Banaue, Hingyon, Lagawe, Lamut), ken Northeastern Nueva Vizcaya (Kasibu, Quezon, Bagabag, Diadi).
Recto, Estrella, Gatchalian, napusgan a mangaywan iti gobierno
Ti bayakabak a yeg ni Crising, a buyogen ti abagat (southwest monsoon), mangpataud iti nasaknap a panagtudo ken posible a panaglayus kadagiti maapektaran a lugar.
Pattapattaen ti PAGASA a mabalin a pumigsa pay ni Crising ket agbalin daytoy a naan-anay a bagyo kadagiti sumarsaruno nga oras ken mabalin a magtengna ti kasasaad a severe tropical storm inton malem wenno rabii ti Biernes, Hulio 18, bayat ti ilalasatna iti Philippine Sea. (Ellalyn De Vera-Ruiz/Manila Bulletin//Lito Hilidon/Bannawag)
