Nagun-od ti Marcos administration ti approval rating ti kaaduan gapu iti panangtamingda iti tallo kadagiti 14 a kangrunaan nga isyu, segun iti “Ulat ng Bayan” survey nga insayangkat ti Pulse Asia idi Hunio 2025.
Iti resulta a naipalgak ita nga aldaw, Hulio 17, kuna ti Pulse Asia a 63 a porsiento dagiti respondent ti umanamong iti panagresponde ti administrasion kadagiti lugar a naapektaran iti didigra, 62 a porsiento ti umanamong iti pannakasalaknib dagiti overseas Filipino workers (OFW), ken 53 a porsiento ti umanamong iti panangtulong kadagiti mannalon.
Adu a respondent ti umanamong iti panangtaming ti administrasion iti natalged a nailian a teritorio (48 a porsiento), pannakadadael ti aglawlaw (44 a porsiento), panagturay ti linteg (42 porsiento), panagregget iti kappia (42 a porsiento), ken panangpataud iti trabaho (42 a porsiento).
Segun iti surbey, dandani agpada ti approval (39 a porsiento) ken disapproval (36 a porsiento) rating ti administrasion iti mainaig iti panagraira ti krimen.
Rep. Barzaga, indarum ni bilionario nga Enrique Razon iti ₱100-milion a cyber libel
Iti sabali a bangir, nangato ti naalada a disapproval rating iti mainaig iti implasion wenno ingingina ti presio dagiti magatgatang (66 a porsiento) ken panangkissay iti kinakurapay (54 a porsiento).
Nangato met ti disapproval rating a naala ti administrasion iti panangparmek iti korapsion (50 a porsiento), panangipangato iti sueldo dagiti mangmangged (48 a porsiento), ken panangtaming iti di naigagara a panagbisin (40 a porsiento).
Nupay kasta, kinuna ti Pulse Asia a simmayaat dagiti approval rating iti amin a 14 a performance area iti nagbaetan ti Marso ken Hunio 2025. (Ellalyn De Vera-Ruiz/Manila Bulletin//Lito Hilidon/Bannawag)
