ADU dagiti patneng wenno natibo a nateng iti Kailokuan (indigenous food plants wenno IFPs). Mairaman ditoy ti alukon, sarsarapa, buga, kapaskapas, sugodsugod, botbotones, ariwat, apeng, kdp. Nabaknang dagitoy iti bitamina, mineral, ken phytochemicals nga addaan kadagiti antioxidant properties a dakkel ti maitulongda iti pannakapasayaat ti salun-at. 

Kadawyan a maabraw wenno madinengdeng, maigisar, wenno mapamagaan sakbay a maluto dagiti indigenous food plants. Nupay kasta, no ditay ammo ti kasayaatan a wagas ti pannakaisagana dagitoy, mabalin a kissayanna ti imet dagitoy a nateng a phytochemicals a mangibunga met iti pannakaikabassit ti antioxidant properties ken dadduma pay a benepisio a maipaay dagitoy a nateng iti salun-at.

Ngarud, babaen ti panagadal nga insayangkat ti Mariano Marcos State University (MMSU) iti Siudad ti Batac, naammuan ti kaadu ti phytochemical contents ken antioxidant activity dagitoy no maidasar a (1) saan a mailuto, (2) maipaburek (maabraw), (3) makelnat, wenno (4) maipayangyang.  Babaen dagitoy a wagas, agserbi dagitoy a pagibasaran no ania ti napintas a sistema a pannakaisagana dagitoy.

Cabie, dati a presidente ti GUMIL Filipinas, napili a maysa kadagiti pakaipaayan ti Distinguished Bedan Award

Dagitoy man dagiti nadumaduma a sistema a nakitada a kapintasan a maaramid iti tunggal IFP: 

Ni Magsasaka Siyentista Precious Jamorabon ti Burgos, Ilocos Norte, ken ti mulana a sugodsugod.

1. No panggep nga ipatulod iti abroad, kapintasan a mapayangyangan ti sarsarapa, buga, kapaskapas, ken sugodsugod. 

No sarsarapa, aramaten ti rangawna. Addaan daytoy iti phenolic content a 423.49 mg ken antioxidant activity a 91.43%.  No kapaskapas, mairekomendar a maaramat ti naganus a bungana.  Addaan daytoy iti 73.19 mg a phenolic content ken 90.89 porsiento nga antioxidant activity.  No met sugodsugod, kas iti kapaskapas, aramaten met ti naganus a bungana. Addaan daytoy iti 24.71 mg a phenolic content ken 64.59 porsiento nga antioxidant property. 

2. No isagana a kas taraon kalpasan ti pannakaala dagitoy, mairekomendar met a makelnat ti sabong ti alukon ken rangaw ti sugodsugod. No daytoy a sistema ti suroten, makaala iti alukon iti phenolic content a 112.42 ken 91.49 porsiento nga antioxidant property. No sugudsugod, makaala iti 122.38 mg a phenoloc content ken 88.81 percent nga antioxidant property. 

Dakkel a benepisio ti maipaay dagitoy a patneng a nateng malaksid a makaited pay dagitoy iti nayon a pamastrekan. Mairekomendar ngarud a suroten ti umisu a pannakaisagana dagitoy tapno di masayang dagiti imetda a phytochemicals ken antioxidant properties. 

Makiuman iti MMSU Research Directorate para iti nayon nga impormasion.

(Naibasar daytoy a sinurat iti panagadal a napauluan iti “Recommended Processing Methods to Enhance the Properties of Iloko Indigenous Vegetables” nga insayangkat da Meingelline Vivit, Cecile Gaoat, ken Menisa Antonio, agpapada a researcher manipud iti MMSU Batac).—O