Dua a sako ti tultulang ti tao a mapapati a dagiti mapukpukaw a "sabungeros” ti nasarakan iti Taal Lake iti Batangas idi Huebes, Hulio 17, kinuna ni Justice Secretary Jesus Crispin C. Remulla.
Kinuna ni Remulla a ti lokasion dagiti naala a sako ket intudo dagiti boatmen a binigbig ti akusado ken nagbalin a whistleblower a ni Julie “Dondon” Patidongan alias “Totoy.”
Kinuna ni Remulla nga iti pannakaamiris iti linaon ti dua a sako, nalawag a paset ti rurog ti tao dagitoy a pakairamanan ti “paragpag ti tao.”
Kinunana pay a dagiti dua pay a sako a naala, naglaon iti darat ken mapapati a nausar a pagpadagsen tapno agtalinaed dagiti dadduma a sako iti lansad ti dan-aw.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Remulla a ti pannakaala dagiti dua a sako nga addaan kadagiti tulang ti tao ket mangipakita a daytoy ket “positibo a pakakitaan nga ammona (ni Patidongan) ti sarsaritaenna.”
Kabayatanna, kuna ni Remulla a nakali dagiti autoridad iti maysa a sementerio iti Batangas dagiti bangkay ti tallo a tattao a mapapati a nairaman iti online cockfighting wenno e-sabong a nagpukaw idi 2020 iti Lipa, Batangas.
Inlawlawagna nga inkeddeng dagiti polis a maitabon dagiti bangkay iti kamposanto kalpasan a saan nga innala dagiti kabagianda manipud iti puneraria. (Jeffrey Damicog/MANILA BULLETIN)
