Ininspeksion ni Presidente Ferdinand Marcos Jr. ita nga aldaw, Hulio 18, ti pannakaisagana dagiti food pack a maiwaras kadagiti lugar a maapektaran iti Bagyo Crising.
Kaduana ti anakna a ni William Vincent a napan iti National Resource Operations Center ti Department of Social Welfare and Development (DSWD) iti Siudad ti Pasay tapno kitaenda dagiti food pack a maipatulod kadagiti inapektaran ni Crising.
Kinaduaan ni DSWD Secretary Rex Gatchalian ti presidente a naginspeksion.
Insaaden ti DSWD ti nasurok a 3 a milion a kahon a naglaon iti family food packs (FFP) kadagiti 935 a bodega iti entero a pagilian.
Barko a RORO nga addaan nasurok a 300 a pasahero, limned iti Basilan
Bayat a masursurat daytoy, addan inlatang ti DSWD a ₱2.9 a bilion a pondo ken lebben a buklen ti nasurok a 3 a milion a FFP, 28,107 a ready-to-eat a taraon, ken 334,791 a non-food item.
Binilin ti presidente dagiti maseknan nga ahensia ti gobierno nga agridamda iti idadateng ni Crising iti pagilian.
Pimmigsa ni Crising bayat nga agpalaud-amianan a laud iti Cagayan-Babuyan Islands, segun iti waragawag ti Philippine Atmospheric, Geophysical and Astronomical Services Administration (PAGASA) itay 11:00 ti agsapa (Hulio 18).
Adda ni Crising iti 195 a kilometro iti daya ti Tuguegarao City, Cagayan, ket mabalin nga agdisso iti Cagayan wenno iti Babuyan Islands ita a malem wenno rabii ti Biernes, Hulio 18. Agtultuloy a pumigsa daytoy agingga nga agbalin a Severe Tropical Storm inton Sabado, Hulio 19, ti agsapa wenno malem. (Ruth Abbey Gita-Carlos/PNA//Lito Hilidon/Bannawag)
