Inarestar dagiti kameng ti Criminal Investigation and Detection Group (CIDG) ti uppat a ganggannaet ken siam a Filipino gapu iti pannakairamanda iti illegal a panagminas iti nasulinek a lugar iti Agusan del Sur.
Kinuna ni Police Brig. Gen. Romeo Macapaz, direktor ti CIDG, insayangkatda ti operasion gapu iti naawatda a napatalgedan nga intelligence report maipapan iti pannakairaman ti Intsik iti illegal a panagminas iti balitok iti Barangay Bunawan Brooks iti ili ti Bunawan, i'toy a probinsia.
Segun iti intelligence report ti CIDG, dagiti uppat a naarestar nga Intsik ti mangponpondo iti illegal a panagminas iti lugar.
Babaen ti tulong dagiti local environment official ken lokal a polis, napan dagiti kameng ti CIDG iti lugar ket naarestarda dagiti 13 a tao a pakairamanan ti uppat nga Intsik.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Macapaz natiliwan dagiti suspek iti akto nga agminminas iti balitok ken dadduma pay a mineral nga awanan iti umisu a permit wenno lisensia manipud iti Mines and Geosciences Bureau.
Nasamsam dagiti autoridad dagiti alikamen ken ramit iti panagminas, agraman dagiti darat nga addaan iti balitok, palanggana, sluice machines ken kahon, excavator, generator set, water pumps, hydraulic pumps, gasolina, pala, solar lights, ken solar panels.
Agbalor iti ₱8 a milion dagiti nakompiskarda.
Impaganetget ni Macapaz nga amin a mineral a rekursos kadagiti pribado ken para iti publiko a daga nga adda iti uneg ti teritorio ken exclusive economic zone ti Filipinas ket kukua ti Filipinas.
Maidarum dagiti suspek iti kaso a panaglabsing iti Section 103 (Theft of Minerals) a mainaig iti Section 55 (Minerals Processing Permit) ti Republic Act No. 7942 (Philippine Mining Act of 1995) ken iti Section 27 ti Republic Act 7076 (People's Small-scale Mining Act of 1991). (Aaron Recuenco/Manila Bulletin//Lito Hilidon/Bannawag)
