Saan nga anamongan ti dadduma a senador ti pannakabalbaliw iti petsa ti panagummong manen ti Senado a kas impeachment court inton Agosto 4, makalawas kalpasan ti umuna a regular a sesion ti maika-20 a Kongreso.
Ni Senador Joel Villanueva ti umuna a nangiwaragawag a mabalin nga agummong ti impeachment court ti Senado inton Agosto 4 para iti kaso nga impeachment ni Bise Presidente Sara Duterte.
Kinuna ni Sen. Francis Pangilinan ita nga aldaw, Hulio 18, nga agkiddawda iti panangilawlawag mainaig iti singasing a nabaliwan a petsa.
Segun ken ni Sen. Panfilo Lacson, masapul a pagsasaritaanda dayta a singasing iti plenario ken kitaenda no nainkalintegan dagiti pannakaitantan a panagummong ti impeachment court, sa pagbobotosanda daytoy.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Sen. Vicente Sotto III a masapul a marugian ti impeachment trial iti kabiitan a panawen, ta nabayagen a naitantan daytoy.
Iti sabali a bangir, pinatalgedan ni Sen. Paolo Aquino IV ti panagkumitna iti panangsigurado iti nainkalintegan ken nasin-aw nga impeachment trial a mangsalimetmet iti panagturay ti linteg ken agserbi iti interes ti publiko.
Itay kallabes, kinuna ni Senate President Francis Escudero a maaramid ti panagsapata dagiti senator-judge inton Hulio 29, ket mangrugi ti panangbista iti Hulio 30.
Kinuna met ni Sen. Ronald Dela Rosa a mangidatag iti mosion a mangsaludsod no kayat dagiti baro a kameng ti Senado iti maika-20 a Kongreso nga ituloy ti impeachment trial ni Bise Presidente Duterte. (Dhel Nazario/Manila Bulletin//Lito Hilidon/Bannawag)
