Walo a tattao ti natay ken uppat pay ti nadunor iti panagdidinnungpar ti dua a passenger van ken maysa a truck iti Barangay San Pablo, Aurora, Isabela iti 1:45 ti parbangon ti Sabado, Hulio 19.
Segun kadagiti polis, dagiti walo a natay ket ti drayber ken pito a pasahero ti maysa a passenger van. Uppat ti nabigbigen, ni Oseas Calderon, ti drayber, a residente ti Bulo, Tabuk City, Kalinga; ken dagiti pasahero da Niches Heizle Cagayongan ti Tabuk City; Claribel Maling ti Bulo, Tabuk City; ken Jing Romboa ti ti Bulo, Tabuk City. Segun kadagiti report, naggapu iti Baguio City dagitoy ken agturongda iti Tabuk City. Saan pay a nabigbig ti uppat pay a pimmusay.
Nadunor met ti drayber ti truck a ni October de Leon ken tallo a pasahero ti sabali pay a passenger van. Maysa kadagiti nasugatan ti adda iti comatose a kasasaad
Kinuna dagiti polis a mapapati a sinakup ti truck ti kasungani a lane ket nadungparna ti passenger van a minaneho ni Ron Ron Onalan ken ti van ni Calderon a sumarsaruno iti likudan.
Nabotosan, baro nga opisial ti Ilocos Sur Provincial Capitol Press Corps
Intaray dagiti immarayat dagiti biktima kadagiti nagduduma nga ospital.
Kinuna dagiti polis a human error ti nakaigapuan ti aksidente ken agtultuloy ti follow-up investigation-da. Naipan met ti truck iti kustodia ti polis para iti imbestigasion ken legal a pannakaproseso.
Nakipagladingit met ti gobierno probinsial ti Kalinga ti ipapatay dagiti biktima a residente iti probinsia. Impasiguradoda kadagiti biktima ti suporta ken tulong ti gobierno probinsial. (Freddie Lazaro/MANILA BULLETIN)
