Kiniddaw dagiti abogado ni dati a presidente Rodrigo Duterte a maitantan koma ti pannakaipaulog ti pangngeddeng ti International Criminal Court (ICC) iti kiddawda nga interim release, ta adda dokumento a nasken nga isubmitirda kas nayon nga impormasion, ngem sinupiat daytoy ti prosekusion.
Iti dua a dokumento a naipaskil iti ICC website, ti kiddaw ti depensa idi Hulio 14 ken ti kiddaw ti prosekusion idi Hulio 18, nagsinnubang ti dua a partido maipapan iti interim release a kiniddaw ti depensa idi napan a bulan.
Iti dokumento a pinirmaan ti abogado ni Duterte a ni Nicholas Kaufman, kiniddawda nga itantan koma ti Pre-Trial Chamber I (PTC I) ti panangyetnagda iti pangngeddeng iti interim release ni Duterte, ta adda pay ti napateg nga impormasion a masapul nga idatagda tapno mapatgan ti kiddawda nga interim release.
Ngem sinupiat ti Office of the Prosecutor ti ICC ti kiddaw ti depensa, ket dinagadagda ti PTC I a dida koma patgan ti kiddaw ti depensa.
Kiddaw ni Duterte a nayon a report ti medical expert, saan a pinatgan ti ICC
Iti dokumento nga impila ni Deputy Prosecutor Mame Mandiaye Niang, kinunana a ti depensa ti nagpili no kaano ti panangkiddawda iti interim release, ta ammona a saan a kompleto ti naidatag.
Segun ken ni Niang, di rumbeng a mapalubosan ti depensa a mangitantan iti panangipaulog ti PTC 1 iti desisionda maigapu laeng ta mabalin nga, iti ania man nga oras, mangidatagda iti nayon a dokumento.
Kinuna ni Niang, a maisupadi iti ibagbaga ti depensa nga adda "panangidumduma" iti kaso, basol met laeng ti depensa no saanda a kabaelan a paneknekan dagiti ibagbagada iti bukodda a mosion, gapu iti nasapa unay a panangidatagda iti kiddaw nga interim release.
Innayon ti prosekusion a mismo a ti depensa ti nangdagdag iti PTC 1 a pardasanda a desisionan ti kiddaw nga interim release ken kiniddawda pay a makissayan koma ti panawen ti prosekusion a mangsungbat.
Kinuna pay ti prosekusion a "pattapatta" laeng ti ibagbaga ti depensa a ti baro nga impormasion nga idatagda ket napateg iti pannakaipaay ti interim release ni Duterte, ket inlawlawagna a mabalin manen nga agkiddaw ti depensa iti interim release no adda nasayaat a makagapu, no bilang ta saan a patgan ti PTC I ti umuna a kiddawda. (Raymund Antonio/Manila Bulletin//Lito Hilidon/Bannawag)
