Saan a mapalubosan dagiti abogado ni dati a presidente Rodrigo Duterte a mangiruar iti opisial a ladawanna, segun ken ni Bise Presidente Sara Duterte itay Hulio 18.
Iti pannakipatangna kadagiti mangsupsuportar kadakuada iti Scheveningen Prison iti The Hague, Netherlands, a nakaidetinian ti dati a presidente gapu iti kaso a crimes against humanity, nangipaay ti bise presidente iti kaudian a damag maipapan iti salun-at ti amana ken ania man a plano a mangted iti publiko iti pakakitaan iti dati a presidente.
Kinuna ti bise presidente a maiparit kadagiti abogado ti mangala wenno mangiruar ti ladawan ti klienteda ta mabalin a maikkat kas abogado ti klientena, ti abogado a mangaramid iti daytoy.
Impanamnama ti bise presidente a nasayaat ti kasasaad ti amana, ket no mabalin la koma, dumar-ay daytoy iti “Free Duterte Rally” a maangay inton Hulio 19.
DOH, namakdaar iti posible a pannakadangran iti Traslacion
Ngem inaklon ti bise presidente nga adu ti kimmuttongan ti amana ta saanna a makan dagiti kayatna a kanen kas iti balatong, ta maiparit ti mangyeg iti taraon manipud iti ruar ti detention facility.
Itay kallabes, binabalaw ti bise presidente ti nag-viral a ladawan a mangipakpakita a “malnourished” ken “nakapsut” ken kasla sidadalit ti amana, idinto nga awan met daytoy iti ospital ti detention facility.
Nupay kinunana a nupay adun ti imresan ti amana, impaganetget ti anakna a napia ti kasasaad daytoy. (Raymund Antonio/Manila Bulletin//Lito Hilidon/Bannawag)
