Kinompirmar ti Kamara ita nga aldaw, Hulio 19, babaen ti panakangiwatda a ni Atty. Princess Abante, a nagtungpalda iti pammilin ti Korte Suprema (SC) a mangidatag iti impormasion mainaig iti impeachment ni Bise Presidente Sara Duterte.
Segun ken ni Abante, ti Office of the Solicitor General (OSG), nga agpapaay a kas abogado ti Kamara, ti nangidatag iti kidkiddawen ti SC babaen ti Philippine Judiciary Portal ket inikkanda iti kopia amin a maseknan a partido.
Maisubmitir ti pisikal a kopia iti kangatuan a pangukoman inton Lunes, Hulio 21.
Iti indatagda a sungbat iti SC, impaganetget ti Kamara a dagiti uppat nga impeachment complaint ket naiproseso a maitunos iti sagudayen ti Konstitusion.
Kasapulan ti natibker ken nainkalintegan a pagtaktakderan iti parikut iti WPS --NMC
Inlawlawag ti Kamara a dagiti tallo nga immuna nga impeachment complaint ket nairaman iti order of business iti uneg ti 10-session-day period, kas maibatay iti Konstitusion.
Ti maikapat nga impeachment complaint, a pinirmaan ken naberipikar ti apagkatlo (1/3) dagiti kameng ti Kamara, ken isun ti nangbukel iti articles of impeachment a direktan a nayallatiw iti Senado, ken namagbalin kadagiti immuna nga impeachment complaint a moot and academic, ken masapul a maipan iti archive ti Kamara.
Inyendorso ti 215 a kameng ti Kamara ti articles of impeachment, a naanamongan iti plenario idi Pebrero, a mangidardarum ken ni Bise Presidente Duterte iti kaso a graft and corruption, bribery, betrayal of public trust, ken dadduma pay a nadagsen a krimen.
Kinuna ni Abante a nasalakniban dagiti kalintegan ni Bise Presidente Duterte iti due process iti sidong ti proseso ti impeachment, nga isu ti pakaipaayaan iti gundawayna a mangidepensa iti bagina ken mangidatag kadagiti ebidensia.
Siraraem nga impetteng ti Kamara iti Korte Suprema, a ti laeng Kamara ti addaan iti autoridad iti bukodda a proseso, maysa a karbengan a naibatay iti separation of powers ken iti kasasaad ti lehislatura a kapadpadana a sanga ti gobierno.
Segun iti Kamara, saan nga imbinsabinsa ti Konstitusion no kasano nga usigen ti tunggal diputado ti impeachment complaint sakbay nga agpirmada, ken awan met ti pangibatayan iti panangkuestionar iti sertipikasionda, iti sidong ti sapata, nga inadalda ken naawatanda dagiti darum ken mangsuportar a dokumento.
Innayon ti Kamara nga agtalekda nga ipaay ti Korte Suprema ti isu met laeng a panagraem kadagiti kalintegan ti kapadana a sanga ti gobierno kas nailanad iti demokratriko a sistema ti pagilian.
Iti kallabes, binilin ti Korte Suprema ti Senado ken Kamara a mangidatagda iti nasapataan nga impormasion ken dokumento no kasano nga immatonan ti Kamara ti impeachment complaint, agraman saludsod maipapan iti tiempo, proseso, ken pannakipaset dagiti kamengda.
Agpapan ita, saan pay a narugian ti impeachment trial ni Duterte iti Senado. (Ellson Quismorio/Manila Bulletin//Lito Hilidon/Bannawag)
