Impanamnama ni Presidente Ferdinand Marcos Jr. iti publiko nga agtultuloy ti panagpartuat ti gobierno iti physical national ID cards, uray no igangganetgetna ti digitalization babaen ti eGovPH Super App.
Daytoy ti kinuna ni Marcos bayat ti panangidaulona iti pannakayalnag ti eGovPH Super App, a pakasarakan ti digital a kopia ti national ID, iti San Juan City idi Biernes, Hulio 18.
Iti panagsaritana, impanamnama ti presidente a bayat a maipangruna dagiti digital service tapno matungpal dagiti kalikaguman ti moderno a panagturay, agtultuloy ti produksion ken pannakaiwaras dagiti pisikal nga ID tapno masigurado ti accessibility para kadagiti amin a sektor.
"Adda pay laeng dagiti sektor ti kagimongantayo a kaykayatda ti pisikal nga ID. Isu nga agtultuloytayo a mangpataud kadagitoy," kinunana.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Marcos, maipangpangruna iti agdama ti digital version ti national ID gapu iti nasaknap a pannakausar daytoy kadagiti online transaction.
Kinuna ti presidente a 88 a millionen a Filipino ti addan digital national ID.
Innayonna a napaneknekan a nasken ti digital ID para iti pannakagun-od kadagiti serbisio a naitipon iti eGovPH Super App, maysa a one-stop mobile platform a nadisenio a mangpasimple iti transaksion ti gobierno.
"Babaen ti digital ID, kabaelantayo nga aramiden amin dagiti banag a kabaelan nga aramiden ti eGov app," kinuna ni Marcos.
Segun iti kaudian a datos manipud iti Philippine Statistics Authority (PSA), 93.48 a milion a Filipino ti nagrehistron para iti national ID, manipud iti dagup a populasion a 112.7 a milion.
Manipud idi Hunio 6, impadamag ti PSA ti pannakaiteden ti 54.91 a milion a physical national ID cards. (Argyll Cyrus Geducos/MANILA BULLETIN)
