Saanto a mangparnuay ti Taiwan iti pannakisupiat iti China, kinuna ti bise presidente ti agwaywayas nga isla idi Biernes, Hulio 18, a nalidayan iti "agresibo a panagtignay ti militar" ti China a maibusor iti demokrasia ti isla nga ibagbaga ti China a kukuana.
"Saanmi a sapsapulen ti riri. Saankami a mangpataud iti panagsusupiat," kinuna ni Bi-khim Hsiao, ken innayonna a dinagadagda ti China a makikomunikar koma a buyogen ti panagpapada ken panagraem.
Segun ken ni Hsiao, a nagserbi iti babaen ni Taiwanese President Lai Ching-te sipud panagakemda idi napan a tawen, naimatanganda ti yaadu dagiti panagprobokar ken panangiwayat (ti Chinese Communist Party) a mangserrek, mangsabotahe, ken mamagsisina iti kagimongan ti Taiwan.
Tagtagikuaen ti China ti Taiwan a kas paset ti teritoriona ken nagpangta a sakupenna daytoy, uray agaramatda iti puersa, no kasapulan. Iti kallabes a tawen, pinapigsa ti China ti panangbutbuteng ti militar a puersana iti isla, nga inaldaw a mangibabaon iti eroplano ken bapor a panggubat iti masakupan daytoy a baybay ken tangatang.
Damag nga adda OFW a nairaman iti uram iti Hong Kong, im-imbestigaren ti DFA
Segun kadagiti opisial ti Czech intelligence idi napan a bulan, nagplano dagiti Chinese diplomat nga isayangkatda ti maysa a pannakaaksidente iti kotse idi simmarungkar ni Hsiao iti Czech Republic idi 2024. Awan ti napasamak nga aksidente ngem maysa nga opisial ti China ti nanglabsing iti red light ti trapiko bayat a sinurotna ti kotse ni Hsiao.
Iti panagbitlana iti Taiwan Foreign Correspondents' Club iti Taipei, kinuna ni Hsiao a nakasagrap isuna iti nadumaduma a kita ti pangta ken panangpilit kadagiti napalpalabas a tawen, agraman panangdusa ti China.
Maipapan iti report ti U.S. intelligence nga adda panggep ti China a mangsakup iti Taiwan sakbay ti 2027, kinuna ni Hsiao a dayta ti sagsaganaan ti gobiernoda.
Kas iti kaaduan a pagilian, saan a bigbigen ti Estados Unidos ti Taiwan a kas maysa a pagilian, ngem agpapaay a kas kangrunaan nga unofficial ally. Ngem supsuportaran ti Estados Unidos (US) ti panagtalinaed iti kasasaad ti relasion ti Taiwan iti China, a kaipapananna nga awan ti asino man kadakuada ti aggaraw tapno agwaywayas wenno mangsakup.
Aggapu iti US dagiti armas ti Taiwan, nga adda bukodna a paglintegan a mangipaay iti wagas a pangdepensada iti isla. (Associated Press/Manila Bulletin//Lito Hilidon/Bannawag)
