Naiparang iti media iti Manila City Hall ti 10 a suspek, agraman dagiti kameng ti nalatak a “Dura-Dura” gang ken dadduma pay a naidarum iti serioso a kriminal a kaso ita nga aldaw, Hulio 21.
Indauluan da Manila Mayor Francisco “Isko Moreno" Domagoso, Vice Mayor Chi Atienza, ken Manila Police District (MPD) Director Brig. Gen. Arnold Abad ti pannakaiparang dagiti nasao a suspek.
Maysa kadagiti nakemmeg ni alias Russell, nga addaan kaso a panangrames nga awan ti piansana. Maysa pay a suspek nga agnagan iti alias Niño, ti adda iti sidong ti autoridad gapu met laeng iti kaso a di mapiansaan. Naiparang ni Jako gapu iti kaso a pammapatay (murder), idinto a nakemmeg ni Ian gapu iti panagkidnap. Maysa pay kadagiti natiliw ni Marilyn Ponce, a naidarum iti kaso nga illegal drug possession.
Iti sabali a bangir, napatalgedan a kameng ti “Dura-Dura” gang dagiti lima pay a nakemmeg. Isuda ti grupo a mangbikbiktima kadagiti agbibiahe ken magmagna babaen ti nalatak a taktika ti krimen iti kalsada.
Phivolcs: Bulkan Mayon, nagtalinaed nga aktibo
Kinuna ni MPD Public Information Office Maj. Bautista a singaen ti “Dura-Dura” gang dagiti biktimada babaen ti panangtupra kadakuada, a mangpataud iti pannakariro ken mangted iti gundaway kadagiti kakumplotda a mangagaw kadagiti napateg a banag kas kadagiti selpon ken pitaka.
Nabigbig dagiti kameng ti “Dura-Dura” gang a da Raffy, Brandolph, Kyle, Jomar, ken Danilo a nakemmeg gapu iti reklamo nga impila ti nabiit pay a nabiktimada iti uneg ti bus a lumablabas iti Taft Avenue.
Segun ken ni Bautista, surotenda ti biktimada bayat a sumrek iti bus, kalpasanna iposisionda ti bagida iti asideg ti biktima agingga a masinga ken makornerda ti biktima, ket ditanton nga alaenda dagiti sanikua ti biktima, a kaaduanna a selpon.
Segun kadagiti opisial, kabaelan dagiti suspek ti agtakaw ti agingga iti lima wenno innem a selpon kada aldaw gapu iti daytoy a taktika, a gagangay nga aramidenda iti uneg ti napekpek a bus wenno dyip.
Addan iti sidong ti polis dagiti sangapulo a suspek bayat ti panangimtuod kadakuada. (Diann Calucin/Manila Bulletin//Lito Hilidon/Bannawag)
