Agdagup iti ₱17 a milion ti balor dagiti nadadael nga impraestruktura iti Ilocos Sur gapu iti Severe Tropical Storm a Crising (international name Wipha), segun iti Provincial Disaster Risk Reduction and Management Office (NDRRMCO) ita nga aldaw, Hulio 21.
Segun ken ni provincial disaster risk reduction and management officer Rhon Arquelada, nairaman kadagiti nadadael ti slope protection ti maysa a day care center iti Barangay Lubang iti ili ti Cervantes, farm-to-market road, maysa a pasilidad ti ospital, ken dagiti flood control project. Adda pay siam a balay ti naipadamag a bassit laeng ti dadaelda
Agarup 2,115 a pamilia, wenno 6,718 a tattao a naapektaran ti bagyo ti naikkan iti family food packs, hygiene kits, ken sleeping kits manipud iti Department of Social Welfare and Development (DSWD), babaen ti pannakitinnulong dagiti local government unit.
Nangipaay met ti Provincial Health Office kadagiti ag-agas ken serbisio medikal.
Nabotosan, baro nga opisial ti Ilocos Sur Provincial Capitol Press Corps
Nupay rimmuaren ni Crising iti pagilian, binalakadan ti PAGASA dagiti local disaster risk reduction and management council nga agtignayda gapu ta mabalin nga adda panaglayus wenno panagreggaay ti daga gapu iti napigsa a tudo a yeg ti abagat (southwest monsoon) nangruna iti madalanan dagiti karayan iti lower Abra, Silay-Sta. Maria, Buaya, ken Amburayan. (Leilanie Adriano/PNA//Lito Hilidon/Bannawag)
