Dua a tao ti kompirmado a natay, idinto a 225,985 a pamilia ti inapektaran ti Severe Tropical Storm a ni Crising (international name Wipha) ken ti napapigsa nga abagat (southwest monsoon) iti adu a paset ti pagilian, segun iti National Disaster Risk Reduction and Management Council (NDRRMC) ita nga aldaw, Hulio 21.
Maysa a taga-Northern Mindanao ken maysa a taga-Caraga dagiti kompirmado a natay, idinto a komkompirmaren pay laeng ti NDRRMC dagiti tallo pay a naireport a natay iti met laeng Northern Mindanao ken iti Davao region.
Segun iti NDRRMC, dagiti naapektaran a pamilia ket katukad ti 800,864 a residente ti 1,556 a barangay iti 16 a rehion iti entero a pagilian.
Iti daytoy a bilang, 5,921 a pamilia wenno 20,115 a katao ti nagkamang kadagiti 3191 nga evacuation center idinto a 16,671 a pamilia a katukad ti 70,720 a katao ti matultulongan iti ruar ti pagbakuitan.
Kasapulan ti natibker ken nainkalintegan a pagtaktakderan iti parikut iti WPS --NMC
Impalgak ti NDRRMC a 1,234 a balay ti nadadael gapu iti epekto ti nadawel a panawen iti Region 1 (Ilocos Region), 2 (Cagayan Valley), Calabarzon, 6 (Western Visayas), 9 (Zamboanga Peninsula), 10 (Northern Mindanao), 11 (Davao Region), 12 (Soccskargen), Caraga, Bangsamoro Autonomous Region in Muslim Mindanao (BARMM), Cordillera Administrative Region (CAR), ken iti Negros Island Region. (Priam Nepomuceno/PNA//Lito Hilidon/Bannawag)
