Impaganetget ni Senate President Francis “Chiz” Escudero ita nga aldaw, Hulio 21, ti pammatina a matuloy ti impeachment trial ni Bise Presidente Sara Duterte uray ania ti mapasamak.
Daytoy ti kinuna ni Escudero kalpasan a naguummong dagiti grupo dagiti estudiante iti Senado tapno yawagda ti saannan a pannakipaset kas presiding judge ti impeachment court ti Senado.
Ti grupo, a buklen dagiti gunglo ti agtutubo ken dadaulo ti estudiante manipud iti University of the Philippines, Ateneo de Manila, Rizal Technological University, ken Dela Salle University, ti nangdagadag ken ni Escudero nga aglusulos kas presiding judge tapno maitakder manen ti kinalinteg ken kredibilidad ti proseso ti impeachment a "napukaw iti nabiit pay gapu iti napolitikaan nga intriga ken pannakikompromiso."
Kuna ni Escudero a saan a kasapulan a sungbatanna dagiti a saludsod dagiti grupo nga "agngarngariet a maituloy ti impeachment trial," ta matuloy ken maaramid daytoy kas maitunos iti linteg.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Escudero, nalawag a dagitoy a gunglo, anamonganda ti impeachment ti bise presidente ken saanda a kayat ti bise presidente.
Kinuna ni Escudero a saanda a dengngen ti asino man nga umanamong iti impeachment, wenno iti asino man a sumupiat wenno umanamong iti naidarum, ta aramidenda ti ammoda nga umisu ken mayannatup iti linteg.
Maipapan iti iskediul ti impeachment court ti Senado inton Agosto 4, kinuna ni Escudero a pagsasaritaan dagiti senador daytoy inton agsubli ti sesionda, ngem isu ti intudingda ta masapul pay a patulodanda iti pakaammo (notice) dagiti maseknan a partido sakbay nga aramidenda ti panangbista.
Kinuna ni Escudero nga opisial nga agsubli ti sesion ti Senado iti panaglukat ti maika-20 a Kongreso inton Hulio 28, ket iti daytanto nga aldaw masapul a mangpilida iti agbalin a daulo ti Senado, ken maurnos dagiti komite gapu ta adda dagiti baro a kameng ti Senado.
Malaksid iti daytoy, kinuna ni Escudero a masapul pay a risutenda ti parikut no adda met laeng hurisdiksion ti Senado ti maika-20 a Kongreso iti kaso nga impeachment a maibusor ken ni Duterte.
Inlawlawag ni Escudero a maymaysa ken agpada met laeng ti Senado ken impeachment court, isu a pagsasaritaanda dayta nupay saanda nga agummong a kas impeachment court. (Hannah L. Torregoza/Manila Bulletin//Lito Hilidon/Bannawag)
