Nagkiddaw ti abogado ni dati a presidente Rodrigo Duterte a maitantan koma ti confirmation of charges hearing iti kasona a crimes against humanity a naituding a maaramid inton Septiembre 23, ta masapul pay nga angayenda ti status conference ta adda idatagda a baro nga impormasion iti kaso.
Iti dokumento a naipila idi Hulio 17, impaganetget ti abogado ni Duterte a ni Nicholas Kaufman a nangidatagda iti “urgent request for a status conference” ken pinakaammuanda ti Pre-Trial Chamber I (PTC I) a naawatdan ti maysa nga impormasion maipapan iti dati a presidente.
Kinuna ni Kaufman a ti kiddawda nga status conference ti mangpapardas iti proseso ta mabista a naimbag daytoy a banag, ken ti pannakibiang ti ICC Registrar ti nangtubeng iti depensa a mangidatag iti apelada iti Presidency ti korte.
Naituding ti confirmation of charges hearing ni Duterte inton Septiembre 23, nga isu ti mangikeddeng no agtuloy ti kaso wenno saan.
Kasapulan ti natibker ken nainkalintegan a pagtaktakderan iti parikut iti WPS --NMC
Naidarum ti dati a presidente iti crimes against humanity (murder) mainaig iti war on drugs nga insayangkatna idi nagakem a presidente.
Impaganetget ni Duterte nga awan ti hurisdiksion ti ICC iti kaso ken agkidkiddaw iti interim release, ngem awan pay ti pangngeddeng ti ICC kadagitoy a petisionna. (Raymund Antonio/Manila Bulletin//Lito Hilidon/Bannawag)
