Mangnamnama ni dati a presidente Rodrigo Duterte a mawayawayaanen sakbay a madesisionan ni Bise Presidente Sara Duterte ti panagkandidatona a kas presidente inton 2028.
Daytoy ti imbinglay ni Bise Presidente Duterte iti maysa nga interbiu a naangay iti ruar ti Scheveningen Prison iti The Hague, Netherlands, a nakaidetinian ti amana sipud idi naarestar idi Marso.
Segun ken ni Bise Presidente Duterte, napagsaritaanda ng agama ti maipapan iti 2028 elections, ket kinuna daytoy nga isu ti umuna a tumulong kenkuana no tarigagayanna ti agkandidato a kas pangulo.
Kinuna ti bise presidente a nagsaritaanda nga agama ti maipapan ken ni Presidente Marcos ken ti mabalin nga agngayangay a kas presidente inton 2028.
Retirado a heneral, nakemmeg gapu iti panangsugsog a mangtippuog iti gobierno
Ngem kinuna ni Bise Presidente Duterte iti amana nga awanen a pulos ti mangibotos kadagiti Marcos iti historia ti Filipinas.
Inlawlawag ti bise presidente nga imbotosna ni Marcos idi 2022 ta awanen ti kaduada, ken saanda a kabaelan dagiti mangsupsuportar ken ni Leni Robredo idi 2022.
Patien ti bise presidente nga uray no kadua ni Marcos dagiti “dilawan” ita, saan nga ibotos ti Liberal Party ken dagiti mangsupsuportar kadagiti Aquino ti maysa a Marcos, ken uray ti Makabayan bloc a kadua ti presidente ita, saanda a suportaran ti manoken ti presidente inton 2028. (Raymund Antonio/Manila Bulletin//Lito Hilidon/Bannawag)
