Impila ni Senador Loren Legarda ti Senate Bill No. 518 a mangipasdek iti Young Farmers and Fisherfolk Challenge Council tapno mapaganaygay manen ti industria ti agrikultura ti Filipinas babaen ti reporma nga idauluan dagit agtutubo, a mangpapigsa iti baro a kaputotan dagiti negosiante a mannalon.
Segun ken ni Legarda, ti promedio nga edad dagiti mannalon ket agtawen itan iti 53. Ket no agtultuloy daytoy a kasasaad, mabalin a mangitunda iti panagkurang kadagiti mangpataud iti taraon iti sumaruno a dekada, nga agbalin a pangta iti kinatalged ti suplay ti taraon.
Kinuna ni Legarda a masapul a pagbalinen ti gobierno ti agrikultura a kas napintas a karera para kadagiti agtutubo, idinto a naladingitan ta dandani tallo kadagiti sangapulo a mannalon ken mangngalap ti agbibiag pay laeng iti kinakurapay, a mangupay kadagiti baro a henerasion dagit mannalon a mangpili iti idaytoy a dana.
Impaganetget ni Legarda a masapul nga agtignay ti gobierno a mamagbalin iti agrikultura a makagunggona, makaallukoy, ken nadayaw para kadagiti agtutubo.
Kasapulan ti natibker ken nainkalintegan a pagtaktakderan iti parikut iti WPS --NMC
No agbalin a linteg, mangipaay ti SB 518 iti konkreto a panangtulong, a pakairamanan ti pangrugian a puonan ken pinansial a suporta, pannakagun-od iti boluntario nga insurance para iti salun-at, retirement, ken calamity, agraman ti pananggun-od iti daga, teknikal a panagsanay, ken edukasion a naiturong kadagiti natalged ken moderno a karera iti agrikultura.
Innayon ni Legarda a masapul a rakraken ti panangibain iti agrikultura a kas maudi a pamuspusan, ngem pagbalinen ketdi daytoy a maysa a napaypayso a pagbiagan a naibatay it baro a wagas, panagpapada, ken kinaandur bayat nga iturong ti pagilian iti natalged a taraon ken pannakapnek. (Hannah L. Torregoza/Manila Bulletin//Lito Hilidon/Bannawag)
