Impalgak ti Philippine Atmospheric, Geophysical and Astronomical Services Administration (PAGASA) ita nga aldaw, Hulio 22, a fake news ti nagwaras a paskil nga innem a bagyo ti sumrek iti pagilian itoy a lawas.
Iti kallabes, nagwaras ti paskil iti internet nga innem a bagyo ti sumrek iti Philippine Area of Responsibility (PAR) ita a lawas, isu a naisakbay kano a nasuspenso ti klase.
Inggunamgunam ti PAGASA a palso ti agwarwaras nga impormasion maipapan iti innem a bagyo a sumrek iti pagilian ita a lawas. Palso met a damag ti pannakasuspenso mainaig iti innem a bagyo.
Pinakdaaran ti PAGASA ti publiko a sukimatenda dagiti damag babaen ti opisial a pagwarnakan ti PAGASA (website ken social media), tapno maliklikan ti panaglagaw ken pannakariro.
Kasapulan ti natibker ken nainkalintegan a pagtaktakderan iti parikut iti WPS --NMC
Impalagip ti PAGASA iti publiko a ti panangiwaras iti palso a weather report ket mabalin nga agtungpal iti di nasken a panagbuteng ken palso nga impormasion, nangruna iti panawen ti bagyo. (Jel Santos/Manila Bulletin//Lito Hilidon/Bannawag)
