Pinasingkedan ni Presidente Ferdinand Marcos Jr. ken dagiti nangato nga opisial ti Estados Unidos (US) ti panagtinnulongda a manglapped iti pannakariribuk ti Indo-Pacific a rehion tapno agtalinaed ti talna, talged, ken wayawaya ti panaglayag iti rehion a napateg iti sangalubongan a komersio.
Nakasarita ni Presidente Marcos da US Defense Secretary Pete Hegseth ken US State Secretary Marco Rubio idi Hulio 21 (oras iti Washington) sakbay ti naituding a panagsaritada ken ni US President Donald Trump iti White House inton Hulio 22.
Kinuna ni panakangiwat ti US Department of State Tammy Bruce nga iti panagsarita da Rubio ken Marcos, tinamingda ti kinapateg ti natibker nga aliansa ti US ken Filipinas iti panagtalinaed ti kinatalged iti Indo-Pacific a rehion ken ti panagtinnulongda iti panangipatungpal iti siwawaya a panaglayag iti baybay ken panagdaliasat iti tangatang iti nasao a rehion.
Iti naangay a joint press conference, imparangarang ni Hegseth ti panagkumit ti US iti 1951 Mutual Defense Treaty (MDT), maysa a tulag ti depensa nga agkunkuna nga agtignay ti panangdepensa ti US no adda militar a panangraut iti taaw wenno teritorio ti Filipinas.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay kinuna ni Hegseth a saan nga agsapsapul ti panagsisinnupiat ti US, impaganetgetna met a sisasagana ken sititibker ti US, ken suportaranna ti tarigagay ti Filipinas a mangpamoderno iti armada ken depensa ti pagilian. (Raymund Antonio/Manila Bulletin//Lito Hilidon/Bannawag)
