Dagiti rescuer manipud iti Bureau of Fire Protection, kaduada ti Philippine Red Cross ken ti local government unit ti Quezon City, iti panangikkatda kadagiti puon ti kawayan a nagtupak iti dua a lugan kalpasan ti panagreggaay ti daga iti Barangay Bagong Silangan, Quezon City idi Hulio 23, 2025. (Santi San Juan / MANILA BULLETIN)

Dimmanonen iti ₱4 a bilion ti balor ti nadadael nga impraestruktura gapu iti ken ni tropical storm “Crising” ken enhanced southwest monsoon (abagat) idinto a ₱462 a milion met ti nadadael iti agrikultura, a nangtignay iti pannakaideklarae ti state of calamity iti 29 a lugar iti entero a pagilian, kas impadamag ti Office of Civil Defense (OCD) idi Mierkoles, Hulio 23.

Segun ken ni OCD officer-in-charge Asst. Sec. Bernardo Rafaelito Alejandro IV, 533,213 a pamilia wenno agarup 1.9 milion a tattao ti naapektaran iti Ilocos (Region 1), Cagayan Valley (Region 2), Central Luzon (Region 3), Calabarzon (Region 4A), Mimaropa (Region 4B), Bicol (Region 5), Western Visayas (Region 6), Central Visayas (Region 7), Zamboanga Peninsula (Region 9), Northern Mindanao (Region 10), Davao (Region 11), Soccsksargen (Region 12), Caraga (Region 13), Bangsamoro Autonomous Region in Muslim Mindanao (BARMM), Cordillera Administrative Region (CAR), National Capital Region (NCR), ken Negros Island Region (NIR).

Agarup 46,000 a pamilia ti naibakuit, agraman ti 25,000 a pamilia a temporario nga agnanaed iti 732 nga evacuation center iti entero a pagilian.

Kaaduan kadagiti nadadael nga impraestruktura dagiti flood control projects, road networks, rangtay, ken pasilidad ti gobierno iti Region 1, a dagiti probinsia ti Ilocos Sur, Pangasinan, ken La Union ti napakaruan iti epekto ti bagyo ken abagat. Dagiti dadduma pay a rehion a nangipadamag kadagiti dadakkel a pukawda ti infra ket pakairamanan ti Region 2, 4B, 6, 10, ken CAR.

Nasional

Retirado a heneral, nakemmeg gapu iti panangsugsog a mangtippuog iti gobierno

Kabayatanna, naapektaran ti pannakadadael ti agrikultura ti 11,734 a mannalon ken mangngalap, ken 7,646.38 nga ektaria a pagay, mais, kamote, high-value crops, kasta met dagiti manok ken dingo iti Region 1, 2, 3, 4A, 4B, 6, ken NIR.

Kinuna ni Alejandro a 29 a lugar ti nangideklarar iti state of calamity bayat nga isaysayangkat dagiti ahensia ti gobierno ti humanitarian assistance and disaster response (HADR) efforts. Pakairamanan daytoy ti entero a probinsia ti Cavite nga addaan iti 23 a siudad ken munisipalidad; Siudad ti Malabon ken Siudad ti Quezon iti NCR; dagiti ili ti Sebaste ken Barbaza iti Antique iti Region 6; Umingan, Pangasinan iti Region 1; ken Roxas, Palawan iti Region 4B.

Immadu met iti pito ti bilang dagiti natay gapu iti bagyo ken abagat: tallo iti Region 10, ken saggaysa iti Region 4B, 11, 13, ken NCR. Adda met walo a mapukpukaw a naipadamag iti Region 4B, 6, ken NCR; ken pito a nadunor nga indibidual iti Region 1, 10, 12, ken NCR.

Adda iti Red Alert ti OCD gapu ta dua pay a panagdawel ti panawen, ti Tropical Cyclone “Dante” ken Tropical Depression “Emong”, ti mamalballaag iti pagilian. Iti alas dies ti bigat ti Mierkoles, Hulio 23, addan ni Dante iti 900 a kilometro iti daya ti extreme northern Luzon idinto a nasiputan ni Emong iti 115 a kilometro iti west northwest ti Laoag City. (Martin Sadongdong/MB)