Ti low-pressure area (LPA) iti baybay ti Calayan Island, Cagayan ken ti abagat (southwest monsoon) ti mangyeg iti tudo iti kaaduan a paset ti Luzon, segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 23.
Napigsa a tudo a patauden ti abagat ti mapasaran iti La Union, Nueva Vizcaya, Ifugao, Mountain Province, Nueva Ecija, Quezon, Oriental Mindoro, Palawan, Marinduque, Romblon, Masbate, Sorsogon, Albay, Camarines Sur, Catanduanes, Antique, Iloilo, Pangasinan, Benguet, Tarlac, Pampanga, Bulacan, Metro Manila, Cavite, Batangas, Laguna, Rizal, Zambales, Bataan, ken Occidental Mindoro.
Ti LPA, a posible nga agbalin a bagyo iti sumaruno a 24 nga oras, ti mangyeg iti napigsa a tudo iti Cagayan, Apayao, Ilocos Norte, Ilocos Sur, Abra, ken Kalinga.
Kabayatanna, adayo pay ti bagyo a ni Dante iti daga, segun ken ni PAGASA forecaster Loriedin Galicia, isu a saanda pay a nangipakat iti storm signal ta saan a direkta nga apektaran ni Dante ti ania man a paset ti pagilian, ngem papigsaenna met ti abagat.
DOH, namakdaar iti posible a pannakadangran iti Traslacion
Nasaripatpatanda ni Dante iti 880 a kilometro iti daya ti murdong ti amianan a Luzon, ket agpigsana iti 55 a kilometro tunggal oras iti asideg ti sentrona, ken pugso nga agingga iti 70 a kilometro tunggal oras.
Ti abagat met laeng ti mangyeg iti napigsa a pul-oy iti Batanes, Babuyan Islands, Ilocos Region, Zambales, Bataan, Bulacan, Aurora, Metro Manila, Calabarzon, Bicol Region, Mimaropa, ti Visayas, Zamboanga del Norte, Misamis Occidental, Lanao del Norte, Camiguin, Dinagat Islands, Davao Occidental, ken Davao Oriental. (Ma. Cristina Arayata/PNA//Lito Hilidon/Bannawag)
