Impalgak ni Presidente Marcos a saan a napagsasaritaan ti agtultuloy nga isyu maipapan iti imigrasion dagiti Filipino iti Estados Unidos bayat ti opisial a panagbiahena iti Washington.
Kinuna ni Marcos a saan a ti tallo nga aldaw a panagbisitana iti US ti pakadakamatan iti nasao nga isyu.
"Saan a napagsaritaan. Saan nga itoy a gundaway a mapagsaritaan. Ngem pagaammomi, siempre, ti situasion," kinuna ni Marcos iti post-visit press briefing idi Mierkoles, Hulio 23 (oras ti Manila).
Inyunay-unayna a ti agtultuloy a pannakaideportar dagiti Filipino iti US ket "saan a naiduma" kadagiti immun-una a panagtignay iti imigrasion nga inwayat ti Amerika sakbayna mainaig kadagiti imigrante a sumangsango kadagiti kaso.
Retirado a heneral, nakemmeg gapu iti panangsugsog a mangtippuog iti gobierno
Kinuna pay ni Marcos a dagiti Filipino a napagawid ket mabalin a sumangsango kadagiti kaso a kriminal wenno awan dokumentoda.
"Dagitoy dagiti adda rekordna wenno dagiti wanted, wenno dagiti convicted, aglalo no isuda ket illegal, nga isuda ket TNT, dagitoy ti maideportar," innayon ni Marcos.
Sakbayna, impanamnama ni Philippine Ambassador iti US Jose Manuel Romualdez kadagiti Filipino iti US a mapagawidda iti Filipinas a saan nga iti sabali a pagilian. (Betheena Unite/MANILA BULLETIN)
