Awan ti makita ni hepe ti Philippine National Police (PNP) Gen. Nicolas Torre III a dakes iti karit ni acting Davao City Mayor Sebastian “Baste” Duterte nga agdinnanoganda.
Ngem kayat ti 54 ti tawenna a Torre nga adda kaimudingan ken mapagnumaran ti panaglabanda isu nga inyebkasna ti panggepna a mangpasayaat iti karit iti maysa a charity boxing match a dagiti maur-orda a bayad ti tiket ken ti pay per view ket maited kadagiti inapektaran ni Bagyo Crising ken dadduma pay a dawel ti panawen idi napan a lawas.
Saan a daytoy ti damo a panangkarit ni Duterte ken ni Torre, ta idi regional director pay laeng ni Torre iti Davao region, pinangtaanen ni Duterte a tungpaenna daytoy gapu iti panang-relieve-na kadagiti amin a police commander ti Davao City.
Inaramid ni Torre daytoy idi maawatna nga impormasion a saan nga umisu ti panangireportda kadagiti insidente ti krimen tapno agparang a bassit ti krimen ken natalged iti Davao City.
Retirado a heneral, nakemmeg gapu iti panangsugsog a mangtippuog iti gobierno
"Kinaritnak iti maysa a dinnanogan, ket para kaniak, serioso man isuna wenno saan, aramidentayo laengen daytoy a maipaay iti pagsayaatan, no dayta ti kayatna. Pagbalinentayon a boxing match tapno nalaka a maurnos," kuna ni Torre.
Segun ken ni Torre, kayatna a maangay ti 12-round a boksing inton Hulio 27 iti Araneta Coliseum iti Cubao, Quezon City. Ngem no saan a mabalin iti Araneta, agboksingda iti sadino man a gym nga addaan iti boxing ring.
Inlawlawag ni Torre nga inawatna ti karit ni Duterte ta kayatna ti makaur-or iti pondo para kadagiti pamilia nga inapektaran ti nadawel a panawen kadagiti naglabas nga al-aldaw.
Ngem no agsanud ni Duterte, kinuna ni Torre nga adda ken ni Duterte no kayatna ti agsanud, idinto a ni met Duterte ti nangkarit kenkuana, ket aw-awatenna laeng ti karit daytoy. (Aaron Recuenco/Manila Bulletin//Lito Hilidon/Bannawag)
