Para iti masegseggaan a panagboksingda ken ni acting mayor ti Davao City Sebastian "Baste" Duterte, nangrugin nga agensayo ni hepe ti Philippine National Police (PNP) Gen. Nicolas Torre III iti PNP gym iti Camp Crame, ita a Huebes, Hulio 24, kalpasan nga inawatna ti karit ni Duterte nga agdinnanoganda.
Kayat ni Torre nga aramidenda daytoy ken ni Duterte a kas charity boxing match para kadagiti naapektaran ti bagyo ken abagat.
Naituding nga agboksingda iti Rizal Memorial Coliseum iti Manila. Kinuna ni Torre nga addanto iti nasao a coliseum mangrugi iti alas 9 ti bigat inton Domingo, Hulio 27, tapno urayenna a kaboksing ni Duterte.
Ngem ti saludsod, agparang met la ngata ni Duterte?
Retirado a heneral, nakemmeg gapu iti panangsugsog a mangtippuog iti gobierno
“Adda kenkuana... maangay iti Rizal Memorial Coliseum. Naisaganan ti (boxing) ring sadiay. Adda metten dagiti isponsor a nagkumit a mangted iti ayuda (relief goods) kadagiti naapektaran iti bagyo,” kinuna ni Torre kalpasan ti boxing practice-na iti PNP gym.
“Ania man a kanito, nakasaganaak.Ita no awan isuna, ituloytayo laengen ti aktibidadtayo a panangted iti ayuda iti kailiantayo,” kinuna ti heneral.
Iti agdama, awan pay ti direkta a kompirmasion manipud ken ni Duterte ken ti kampona no awatenna met wenno saan ti karit ni Torre.
Ni Duterte, iti maysa kadagiti podcast-na, ti nangirugi iti amin babaen ti panangkaritna ken ni Torre iti dinnanogan.
Iti podcast, kinuna ni Duterte nga awan met magudgudilan ni Torre no koma saan a hepe ti PNP ket kinunana a mabalinna nga abaken daytoy iti dinnanogan. Itay napan a tawen, impangta met laeng ni Duterte a tungpaenna ni Torre kalpasan ti pannakareliebo dagiti amin a police commander iti Davao City gapu iti mapapati a di umisu a panangireportda kadagiti krimen tapno agparang a natalged a lugar ti Davao City.
Idi napagsaludsodan no nakasaganan, kinuna ni Torre: “Lakayakon ket segun iti trainer-ko, saanen a kas idi ti kinaandurko ken diakon makadanog iti napigsa.”
Ngem kinunana a namnamaenna nga agtuloy ti charity boxing match ket impaganetgetna ti kinapateg ti pondo a mabalin a mapataud manipud iti laban.
Segun kadagiti damag, boksing ti maysa kadagiti paborito ni Torre nga isports idi kadete pay laeng ti PNP Academy.
Nangipaskil met ni Sen. Ronald dela Rosa iti Facebook page-na iti video ni Duterte nga agen-ensayo iti boksing.
Nag-viral ti video ngem saan a dagus a nalawag no naaramid ti nasao a panagensayo ni Duterte kalpasan nga inawat ni Torre ti karit. (Aaron Recuenco/MANILA BULLETIN)
