Pimmigsa pay a lalo ni tropical cyclone “Emong” (international name: Co‑may) ket nagbalinen a naan-anay a bagyo, kas kinuna ti Philippine Atmospheric, Geophysical and Astronomical Services Administration (PAGASA) ita nga aldaw, Hulio 24.
Itay 11:00 iti aldaw, nasaripatpatanda ni Emong iti 220 a kilometro laud-abagatan a laud ti Bacnotan, La Union, wenno 210 a kilometro iti laud ti Dagupan City, Pangasinan.
Manipud iti 110 a kilometro tunggal oras a kapigsa ni Emong ken pugso a 135 a kilometro tunggal oras, nagabalinen a 120 a kilometro tunggal oras ti kapigsana ken agingga iti 150 a kilometro tunggal oras ti pugsona.
Segun ken ni weather specialist ti PAGASA Benison Estareja, iti sumaruno a 24 nga oras, maekspektar a pumigpigsa pay ni Emong, a mabalin pay a dumanon iti 130 a kilometro tunggal oras ti kapigsana bayat ti pananglasatna iti West Philippine Sea nga agturong iti Ilocos Region.
Retirado a heneral, nakemmeg gapu iti panangsugsog a mangtippuog iti gobierno
Nagballaag ti PAGASA a mabalinda nga ingato dagiti pakdaar agingga iti Tropical Cyclone Wind Signal No. 4 apaman a makaasideg ken agdisso daytoy iti daga inton Biernes, Hulio 25.
Agingga ita nga aldaw, Hulio 24, adda iti Signal No. 3 dagiti aminanan a paset ti Pangasinan (Anda, Bolinao, Bani), laud a paset ti La Union (Luna, Balaoan, Bacnotan, San Juan, Siudad ti San Fernando, Bauang, Caba, Bangar), ken abagatan a laud a paset ti Ilocos Sur (San Esteban, Santiago, Siudad ti Candon, Santa Lucia, Santa Cruz, Tagudin).
Agtalinaed iti Signal No. 2 ti Ilocos Norte, ti dadduma a paset ti Ilocos Sur, dadduma a paset ti La Union, tengnga a paset ti Pangasinan (Agno, Burgos, Mabini, City of Alaminos, Sual, Labrador, Bugallon, Infanta, Dasol, Lingayen, Binmaley, Dagupan City, Calasiao, Santa Barbara, Mangaldan, Mapandan, Manaoag, Laoac, Binalonan, San Manuel, San Nicolas, Pozorrubio, Sison, San Fabian, San Jacinto), Apayao, Kalinga, Abra, Mountain Province, Ifugao, Benguet, Babuyan Islands, amianan ken laud a paset ti Cagayan (Rizal, Santa Praxedes, Claveria, Sanchez-Mira, Pamplona, Abulug, Ballesteros, Aparri, Camalaniugan, Allacapan, Buguey, Santa Teresita, Santa Ana, Gonzaga, Lal-Lo, Lasam, Santo Niño, Piat, Tuao), ken ti laud a paset ti Nueva Vizcaya (Kayapa, Santa Fe).
Adda latta iti Signal No. 1 ti dadduma a paset ti Cagayan, laud ken tengga a paset ti Isabela (Santo Tomas, Delfin Albano, Quezon, Mallig, Quirino, Roxas, San Manuel, Aurora, San Mateo, Ramon, Cordon, Burgos, Cabatuan, Cabagan, San Pablo, Santa Maria, Tumauini, Gamu, Luna, Maconacon, Alicia, San Mariano, Naguilian, San Guillermo, City of Cauayan, Echague, Ilagan City, Angadanan, Benito Soliven, City of Santiago, Reina Mercedes, San Agustin, Divilacan, San Isidro, Jones), ti dadduma a paset ti Nueva Vizcaya, Quirino, dadduma a paset ti Pangasinan, amianan ken tengnga a paset ti Zambales (Santa Cruz, Candelaria, Masinloc, Palauig, Iba, Botolan, Cabangan), Tarlac, ken ti laud ken tengnga a paset ti Nueva Ecija (Carranglan, Lupao, Talugtug, Cuyapo, Nampicuan, Guimba, Science City of Muñoz, San Jose City, Pantabangan, Rizal, Llanera, Talavera, Santo Domingo, Quezon, Licab, Aliaga, Zaragoza, San Antonio, Jaen, Cabanatuan City, Santa Rosa, General Mamerto Natividad, Palayan City, Bongabon, Laur).
Nagballaag pay ti PAGASA a mabalin a mapataud ti napeggad nga storm surge nga agingga iti dua a metro ti kangatona iti las-ud ti 36 nga oras kadagiti nababa wenno asideg ti baybay a lugar kas iti Batanes, Cagayan, agraman Babuyan Islands, Ilocos Norte, Ilocos Sur, La Union, Pangasinan, ken Zambales. (Ellalyn De Vera-Ruiz/Manila Bulletin//Lito Hilidon/Bannawag)
