Pinatgan ti Pre-Trial Chamber I (PTC I) ti International Criminal Court (ICC) ti kiddaw ni dati a presidente Rodrigo Duterte a maitantan ti pannakaipaulog ti pangngeddeng iti kiddawna nga interim release.
Daytoy ti desision ti kaaduan nga ukom ti ICC, a sinupiat ni Judge María del Socorro Flores Liera.
Iti dokumento a pinirmaan da Presiding Judge Julia Antoanella Motoc ken Judge Reine Adélaïde Sophie Alapini-Gansou a naipablaak iti publiko idi Hulio 23, maitantan ti pannakaipaulog ti desisionda mainaig iti interim release request agingga nga agtignay ti depensa maipapan iti daytoy a banag, wenno agingga nga ibilang ti Korte a maitutop a desisionandan daytoy.
Inlawlawag ti desisionda a ti laeng naidetine a suspek ti mabalin nga agkiddaw ken mangidatag iti interim release.
Retirado a heneral, nakemmeg gapu iti panangsugsog a mangtippuog iti gobierno
Nupay kasta, impaganetgetda a ti desisionda a mangitantan iti pangngeddeng iti interim release ni Duterte ket dina kaipapanan nga addan nasaksakbay a panagipato iti ania man a banag a maikeddeng iti konsteksto ti proseso mainaig iti panagkiddaw iti interim release, agraman ti agbalinto a pangngeddengda.
Idi Hulio 14, kiniddaw ti depensa iti PTC 1 nga itantanda koma ti panagdesisionda iti kiddaw nga interim release ni Duterte agingga a maidatagdan amin a kasapulan nga impormasion. (Raymund Antonio/Manila Bulletin//Lito Hilidon/Bannawag)
