Binallaagan dagiti autoridad dagiti umili iti sumagmamano a paset ti Metro Manila ken dadduma pay a lugar iti amianan ken tengnga a paset ti Luzon iti nakarkaro a peggad ti flash flood ken panagreggaay ti daga iti baet ti agtultuloy a napigsa a tudo kadagiti napalabas a lawas.
Kinuna ni Assistant Secretary Raffy Alejandro IV, officer-in-charge ti Office of Civil Defense (OCD), a naslepen ti daga kadagiti high-risk a luglugar gapu iti agtultuloy a napipigsa a panagtudo kadagiti napalabas a lawas.
“Gapu iti agtultuloy a panagtudona, dakkel ti risgo ti layus ken panagreggaay ti daga gapu iti saturated soil, nangruna kadagiti high risk area. Monmonitorenmi a nalaing dagitoy a lugar maibatayb iti datos manipud iti DENR-MGB ken mangipaulogkami kadagiti nasapa a pakdaar no kasapulan,” kinuna ni Alejandro.
Immuna nga inreport ti Mines and Geosciences Bureau (MGB) ti Department of Environment and Natural Resources (DENR) nga agarup 3,000 a barangay iti entero a pagilian ti maibilang a nangato ti risgona a maapektaran iti layus ken panagreggaay ti daga.
Retirado a heneral, nakemmeg gapu iti panangsugsog a mangtippuog iti gobierno
Kadagiti nalaka a maapektaran babaen ti pettat a panaglayus ken layus a gubuayen ti tudo, 412 a barangay ti adda iti Metro Manila idinto a nasurok a 200 pay a barangay ti adda iti nadumaduma a paset ti Central ken Northern Luzon.
Kinuna ni Alejandro nga agtaltalinaed a kangrunaan a karit ti nakaro a panaglayus iti Metro Manila, Central Luzon, ken Calabarzon a makapaspasar pay laeng iti epekto ni tropical cyclone a Crising ken dagiti agsasaruno a low-pressure area (LPA) ken southwest monsoon (abagat).
Ngem kinunana a sitatalinaed a natalged dagiti relief effort, ta mangipapaayen ti Department of Social Welfare and Development (DSWD) kadagiti food pack kadagiti dandani tallo a milion a pamilia iti entero a pagilian.
Maibasar iti kaudian a datos ti OCD, agarup 2.7 a milion a tattao ti naapektaran iti agsasaruno a panagdawel ti panawen a nangsaplit iti pagilian, nasurok a 147,000 kadagitoy ti agdama a naipan kadagiti nadumaduma nga evacuation center.
Immuna nga impadamag dagiti autoridad ti 12 a natay ken siam a mapukpukaw ngem dua laeng ti pinasingkedan ti National Disaster Risk Reduction and Management Council (NDRRMC) gapu ta dagiti 10 a dadduma ket mapasingkedan pay laeng.
Dumanon met iti ₱3.8 a bilion ti pannakadadael ti impraestruktura idinto nga impadamag dagiti autoridad ti ₱366 a milion a nadadael agingga ita iti agrikultura. (Aaron Recuenco/MANILA BULLETIN)
