Agtultuloy ti panangipakat ti Pangasinan iti nasakbay a panagbakuit (pre-emptive evacuation) ken agtalinaed ti red alert status bayat a sagsaganaan ti probinsia ni severe tropical storm Emong.
Segun iti unit head ti Provincial Disaster Risk Reduction and Management Office (PDRRMO) emergency operations center a ni Pia Flores ita nga aldaw, Hulio 24, maisaysayangkat ti rescue operations kadagiti ili ti Calasiao, Mangatarem, Bani, Urbiztondo, ken Bugallon.
Agtultuloy ti panangallukoy ti gobierno lokal kadagiti umili nga agkedked iti panagbakuit, nga imbilin ti Office of Civil Defense idi Mierkoles, Hulio 23.
Itay 5:00 iti agsapa, mapan a 1,399 a pamilia, a buklen ti 4,636 a katao, ti pimmanawen gapu iti nakaro a panaglayus iti 16 nga ili ken maysa a siudad. Agdagaup iti 152,383 a pamilia, wenno 485,631 a tattao, ti inapektaran ti layus.
Nabotosan, baro nga opisial ti Ilocos Sur Provincial Capitol Press Corps
Maibatay iti waragawag ti PAGASA itay 11:00 iti aldaw, adda ni Emong iti 220 a kilometro iti laud-abagatan a laud ti Bacnotan, La Union, wenno 210 a kilometro iti laud ti Dagupan City, Pangasinan.
Adda iti Tropical Cyclone Wind Signal No. 3 dagiti ili ti amianan a paset ti Pangasinan--ti Anda, Bolinao, ken Bani.
Naipan met iti Signal No. 2 ti Agno, Burgos, Mabini, Siudad ti Alaminos, Sual, Labrador, Bugallon, Infanta, Dasol, Lingayen, Binmaley, Dagupan City, Calasiao, Santa Barbara, Mangaldan, Mapandan, Manaoag, Laoac, Binalonan, San Manuel, San Nicolas, Pozorrubio, Sison, San Fabian, ken San Jacinto, idinto nga adda iti Signal No. 1 ti natda a paset ti probinsia.
Kinuna ni Flores a ninayonan ti Philippine National Police (PNP) ken Philippine Army dagiti imbaonda a rescue team, idinto a nagkiddaw ti dadduma a local government unit iti kanayonan a rescue personnel ken asset.
Iti sabali a bangir, impalgak ni Gobernador ti Pangasinan Ramon Guico III ti pannakasuspenso dagiti klase iti amin a lebel ti pribado ken para iti publiko a pagadalan, agraman ti trabaho iti opisina ti gobierno, malaksid dagiti adda iti front-line services, iti Huebes ken Biernes. (Hilda Austria/PNA//Lito Hilidon/Bannawag)
