Tinagiragsak dagiti abogado ni dati a presidente Rodrigo Duterte ti pangngeddeng ti International Criminal Court (ICC) a mangitantan iti desisionda iti kiddaw nga interim release, ta kasapulan ti depensa ti adu pay a panawen a mangidatag iti nayon nga ebidensia a napateg iti kaso.
Daytoy ti kinuna ti abogado ni Duterte a ni Nicholas Kaufman kalpasan a pinatgan ti Pre-Trial Chamber 1 (PTC 1) ti ICC ti kiddawda idi Hulio 23, ta kasapulan daytoy a pannakaitantan tapno matamingda dagiti naladaw a pannakaawatda kadagiti napateg a material tapno masuportaran a nalaing ti kiddawda nga interim release ti dati a presidente.
Segun ken ni Kaufman, saan a panangtaktak iti kaso daytoy a tignayda, ta ammo ti PTC 1 ti kalintegan mainaig iti petisionda ken ibilangda daytoy a legal a kiddaw.
Impaganetget ni Kaufman a nupay adu a paset ti kaso ti agtalinaed a confidential, agraman ti makagapu iti pannakaitantan, patienda a ti kurang nga impormasion ket adda dagsenna iti panagtuloy wenno saan ti confirmation of charges hearing.
Senado, pinasingkedanna ti ₱6.793-trilion a nailian a badiet para 2026
Ngem inlawlawag ni Kaufman a saanda pay a pormal a kiniddaw ti pannakaitantan ti confirmation of charges hearing a naituding a maangay inton Septiembre 23.
Maipapan met iti singasing ti sumagmamano a senador nga agkiddaw iti ICC iti pannaka-house arrest ni Duterte, kinuna ni Kaufman a nasayaat met daytoy, ngem agdesision dagiti ukom maibatay iti ebidensia ken risk factors, uray ania pay ti ibagbaga ti Senado ti Filipinas.
No maipapan met iti singasing ni Harry Roque a panagkiddawda iti gobierno ti Netherlands a mangkarit iti pannakaidetine ni Duterte, kinuna ni Kaufman nga awan ti pagbatayan daytoy a kapanunotan, ta dakkel a biddut no mangidatag iti kaso iti Netherlands a maibusor iti Netherlands. (Argyll Cyrus Geducos/Manila Bulletin//Lito Hilidon/Bannawag)
