Nagdisso manen iti daga ni Bagyo Emong (international name: Co-may) itay 5:10 iti agsapa ti Hulio 25 iti Siudad ti Candon, Ilocos Sur, segun iti Philippine Atmospheric, Geophysical and Astronomical Services Administration (PAGASA).
Immuna a nagdisso ni Emong iti Agno, Pangasinan idi rabii ti Huebes, Hulio 24.
Itay 7:00 iti agsapa, nasaripatpatan ti PAGASA ti sentro ni Bagyo Emong iti San Isidro, Abra.
Maekspektar ti panagtuloy ni Emong nga agtignay agturong iti kabambantayan ti Northern Luzon ken mabalin a rummuar iti Babuyan Channel inton tengnga ti aldaw ita a Hulio 25.
Retirado a heneral, nakemmeg gapu iti panangsugsog a mangtippuog iti gobierno
Manipud dita, agpaamianan a laud ni Emong a direkta a lumabas wenno umasideg laeng iti Babuyan Islands sakbay a mumalem.
Mabalin a lumabas ni Emong iti asideg ti Batanes ita a malem wenno rabii, sakbay nga agpaamianan-amianan a daya agingga a makaruar iti Philippine Area of Responsibility (PAR) inton Sabado (Hulio 26) ti agsapa wenno tengnga ti aldaw.
Kalpasan a limmabas iti kabambantayan ti Cordillera, kinuna ti PAGASA a kimmapuy ni Bagyo Emong ket nagbalin laengen a severe tropical storm, nga addaan iti kapigsa a 100 a kilometro tunggal oras ken pugso nga agingga iti 165 a kilometro tunggal oras.
Pattapattaen ti PAGASA a kumapsut pay ni Emong iti daytoy nga aldaw gapu iti panagdissona iti daga, ken agtultuloy a kumapuy agingga iti kaaddana iti pagilian.
Adda iti Signal No. 3 ti Ilocos Norte, Ilocos Sur, amianan a paset ti La Union (Bangar, Sudipen, Balaoan, Luna, Santol, Bacnotan, San Gabriel, Bagulin, San Juan, Siudad ti San Fernando), Apayao, Abra, laud a daya ti Kalinga (Balbalan, Pasil, Tinglayan, Lubuagan), laud a paset ti Mountain Province (Besao, Tadian, Sagada, Bauko, Sabangan, Bontoc, Sadanga), amianan a laud ti Benguet (Mankayan, Bakun, Kibungan, Kapangan), ken ti amianan ken laud a paset ti Cagayan (Santa Praxedes, Claveria, Sanchez-Mira, Pamplona, Abulug, Ballesteros, Rizal, Lasam, Allacapan, Aparri).
Naipan iti Signal No. 2 ti Batanes, ti dadduma a paset ti Cagayan, agraman Babuyan Islands, amianan ken laud a paset ti Isabela (Cordon, City of Santiago, Ramon, San Isidro, Alicia, San Mateo, Cabatuan, San Manuel, Luna, Aurora, Burgos, Roxas, Quirino, Mallig, Delfin Albano, Quezon, Cabagan, Santa Maria, San Pablo, Maconacon, Santo Tomas, Tumauini, Gamu, Ilagan City, Siudad ti Cauayan, Reina Mercedes, Naguilian), amianan a laud a paset ti Quirino (Diffun), laud ken tengnga a paset ti Nueva Vizcaya (Kayapa, Santa Fe, Ambaguio, Aritao, Bambang, Bayombong, Villaverde, Solano, Bagabag, Dupax del Sur, Dupax del Norte, Kasibu, Quezon, Diadi), ti dadduma a paset ti Kalinga, dadduma a paset ti Mountain Province, Ifugao, ti dadduma a paset ti Benguet, ti dadduma a paset ti La Union, ken ti amianan a laud a paset ti Pangasinan (Bolinao, Anda).
Naipakat ti Signal No. 1 ti dadduma a paset ti Pangasinan, ti dadduma a paset ti Isabela, dadduma a paset ti Quirino, dadduma a paset ti Nueva Vizcaya, amianan ken tengnga a paset ti Aurora (Dilasag, Casiguran, Dinalungan, Dipaculao), amianan a paset ti Nueva Ecija (Nampicuan, Cuyapo, Guimba, Talugtug, Science City of Muñoz, San Jose City, Lupao, Carranglan, Pantabangan), amianan a paset ti Tarlac (San Clemente, Camiling, Moncada, San Manuel, Anao, Paniqui, Santa Ignacia, Mayantoc, San Jose, City of Tarlac, Victoria, Pura, Gerona, Ramos), ken amianan a paset ti Zambales (Santa Cruz, Candelaria, Masinloc, Palauig, Iba). (Ellalyn De Vera-Ruiz/Manila Bulletin//Lito Hilidon/Bannawag)
