Indeklarar ti Korte Suprema a maikontra iti konstitusion (unconstituional) ti articles of impeachment nga ingganuat ti Kamara kontra ken ni Bise Presidente Sara Duterte, segun iti waragawag ni spokesperson ti Korte Suprema Atty. Camille Ting ita a Biernes, Hulio 25.
"Inkeddeng ti Korte Suprema a ti impeachment complaint ti Kamara konta ken ni VP Sara Duterte ket iparit ti pagannurotan a maysa-tawen (one-year rule) ket ti due process wenno fairness ket mayaplikar iti amin a tukad ti impeachment process," kinuna ni Ting iti maysa a press briefing.
Kinuna pay ni Ting a saan a makaala ti Senado iti hurisdiksion iti impeachment proceedings.
Inlawlawagna a maibilangen a terminated wenno dismissed dagiti immuna a tallo nga impeachment complaint ken awanen ti sabali nga impeachment complaint a mabalin sakbay ti Pebrero 6, 2026 weno makatawen kalpasan ti pannaka-impeach ni Duterte iti Kamara idi Pebrero 5, 2025.
Senado, pinasingkedanna ti ₱6.793-trilion a nailian a badiet para 2026
Segun ken ni Ting: “Kinuna ti Korte a saanna nga absolbaren ni Bise Presidente Duterte iti ania man a darum kontra kenkuana, ngem ania man a sumaruno nga impeachment complaint ket mabalin laeng a maipila mangrugi iti Pebrero 6, 2026.”
Iti babaen ti Konstitusion, saan a mabalin a mairugi ti impeachment proceedings maibusor iti isu met laeng nga opisial iti nasursurok ngem iti maminsan iti las-ud ti maysa a tawen.
Kinuna ni Ting a dagus nga executory ti unanimous nga en banc decision ti Korte Suprema. Inlawlawagna ketdi a saanna a kayat a sawen a nupay indeklarar ti Korte Suprema ti kasdi a desisionda, ket absueltuen ti Korte Suprema ni Duterte.
Impaganetget ti Korte Suprema a ti rason a naideklarar a null and void ti articles of impeachment ket ti one-year a pannakaiparit kontra iti 4th impeachment complaint. (rva)
