Saan nga inraman ni gobierno ti Filipinas nga indiaya dagiti produkto ti agrikultura iti sangsangalenda a pannakitulag iti Estados Unidos (US) tapno maipababa ti taripa dagiti local export.
Daytoy ti kinuna ni Special Assistant to the President for Investment ken Sekretario ti Economic Affairs Frederick Go kalpasan nga imbaba ti US ti taripa dagiti produkto ti Filipinas iti 19 a porsiento kalpasan ti panagsarita da Presidente Marcos ken US President Donald Trump iti Washington, DC.
Segun ken ni Go, nasalakniban latta ti sektor ti agrikultura iti agdama a sistema, iti laksid dagiti pakaseknan a dagit nalaklaka a produkto ti Amerika ti manglapunos iti lokal a merkado.
Kuna ni Go a dagiti napateg a produkto kas iti bagas, asukar, mais, karne ti baboy ken manok, ken taraon manipud iti baybay ket saan a nairaman iti saritaan nga inanamongan ti Filipinas tapno mapatgan ti kiddaw a maipababa ti taripa ti US iti lokal a produkto iti 19 a porsiento, manipud iti dati a 20 a porsiento.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Go a ti nairaman iti taripa ket dagiti laeng produkto a saan a lokal a partuat ti Filipinas kas iti ag-agas, lugan, soybeans, ken trigo.
Inlawlawagna a saan pay a pinal ti taripa, ta madama pay laeng ti negosasion ti dua a pagilian.
Maipapan iti pannakaidilig iti taripa iti Indonesia a 19 a porsiento, kinuna ni Go nga adu ti inkari ti Indonesia iti Amerika tapno maibaba ti taripa, kas iti pananggatang ti Indonesia iti 50 a Boeing nga eroplano iti US. Ngem awan ti kastoy nga inkari ti Filipinas a gatangen. (Argyll Cyrus Geducos/Manila Bulletin//Lito Hilidon/Bannawag)
