Ipaay ni Presidente Ferdinand Marcos Jr. ti maikapat a State of the Nation Address (SONA) iti Kamara iti Batasan, Siudad ti Quezon, inton Lunes, Hulio 28.
Gagangay a naranga ken narambak, mabalbaliwan ti pasken ita a tawen kas paset ti pannakipagrikna ti gobierno kadagiti Filipino iti entero a pagilian a naglak-am iti dadagsen gapu kadagiti agsasaruno a bagyo ken panaglayus.
Dagiti sumaganad dagiti dadduma a detalye a masapul nga ammuen tapno agtalinaed nga umun-una iti saritaan maipapan iti SONA 2025:
- Gapu iti epekto ti nakaro a tudo ken layus makalawas sakbay ti SONA, kiniddaw dagiti kameng ti Kamara nga idauluan ni dati nga Speaker ken Leyte 1st district Rep. Martin Romualdez a mangangay iti nainut ken simple nga event.
Senado, pinasingkedanna ti ₱6.793-trilion a nailian a badiet para 2026
- Gapu iti daytoy a kiddaw, mangipaulog ni House Secretary General iti memorandum a napetsaan iti Hulio 25 tapno maipatungpal dagiti panagbalbaliw iti red carpet protocol. Inikkat a naminpinsan ti memo ti tradisional a "fashion show" a paset ti red carpet gala sakbay ti SONA.
- Naikkaten dagiti pisikal a red carpet iti north wing ken south wing a lobby. Agtalinaed ti red carpet iti main lobby--maysa a fixture iti dayta a paset ti House of Representatives.
- Agtalinaed a pormal ti dress code, nupay makiddaw kadagiti kameng ti Kamara ken sangaili a dida agkawes iti ania man a nagarbo nga aruat.
- Naipatulod dagiti imbitasion iti SONA idi Hulio 21.
- 85 a kameng ti diplomatic corps ti nangkompirmar iti itatabunoda.
- Immuna a kinuna ni House Spokesperson Princess Abante a ti isu met laeng a bilang dagiti sangaili manipud idi napan a tawen (2,000) ti manamnama nga umatendar. Ngem segun ken ni Iloilo 1st district Rep. Janette Garin, kinompirmarna a makissayan ti attendance iti SONA.
- Kuna ni Garin a maipakat met ti panagin-inut ken kinasimple iti dadduma nga aspekto ti SONA, kas kadagiti dekorasion. Kunana nga awan ti nagatang a baro nga items a para laeng iti dekorasion.
- Kuna pay ni Garin a dagiti merienda a maidasar kadagiti sangaili ket mangitampok iti "local fare," ngem awan ti nagarbo.
- Napatulodanen iti awis ni dati a presidente Rodrigo Duterte kas paset ti protocol para kadagiti sibibiag a dati a presidente. Adda iti agdama a sibabalud iti International Criminal Court (ICC) iti The Hague, Netherlands gapu kadagiti krimen a maibusor iti sangkatawan.
- Saan a manamnama a tumabuno ni Vice President Sara Duterte iti SONA ita a tawen kalpasan nga impatulodna ti dina idadar-ay. Saan met laeng a nagparparang uray iti SONA idi napan a tawen.
- Kuna met ni Abante a maireserbar latta ti tugaw para ken ni Duterte iti VIP gallery iti plenary hall no bilang agbaliw ti panunot daytoy.
- Kantaen ti nangabak iti Voice Season 26 a ni Sofronio Velasquez ti nailian a kanta sakbay ti panagbitla ti presidente.
- Agdagup iti 160 a medical personnel ti ma-deploy iti kaaldawan ti SONA, a pakairamanan ti 17 nga ambulansia a nakapuesto iti uneg ti arubayan ti Kamara. Agarup 115 nga hospital room ti naireserbar kadagiti nadumaduma a medikal a pasilidad iti aglawlaw ti Metro Manila para iti ania man a medikal nga emerhensia a mabalin a mapasamak. (Ellson Quismorio/MB)
