Kas man awan kasiguraduanna ti mapadpadaanan unay a charity boxing match da Philippine National Police (PNP) chief Gen. Nicolas Torre III ken ti acting mayor ti Davao City a ni Sebastian "Baste" Duterte gapu ta naulimek met ti naud-udi no makiboksing kadi wenno saan sipud pimmanaw a napan iti Singapore idi Biernes, Hulio 25.
Naituding a maangay ti boxing match iti Rizal Memorial Sports Complex iti Manila inton Domingo, Hulio 27.
Kinompirmar ti National Bureau of Investigation (NBI) a pimmanaw ni Duterte a napan idiay Singapore dua nga aldaw sakbay ti masegseggaan a charity boxing match.
Kinuna met ti Bureau of Immigration (BI) a kadua ni Duterte ti pamiliana iti commercial flight manipud Davao International Airport.
Retirado a heneral, nakemmeg gapu iti panangsugsog a mangtippuog iti gobierno
Naalaan met ni Duterte iti video iti uneg ti eroplano nga agturong iti Singapore. Segun iti maysa a staff member ti gobierno ti Davao City, pimmanaw ti acting mayor para iti official business a kaduana ti sumagmamano a tattao manipud iti opisina ti lokal a gobierno.
Kinuna ti sabali pay a source a mabalin nga agbiahe pay ti acting mayor a mapan iti The Hague iti Netherlands tapno sarungkaranna ti amana a ni dati a Presidente Rodrigo Duterte, nga adda sadiay sipud idi Marso para iti kaso a sangsanguenna iti International Criminal Court (ICC).
Nanggubuay ti sorpresa a panagbiahe ni Duterte kadagiti saludsod, ta adu ti mamadpadaan iti panagboksingda iti hepe ti PNP a kinaritna iti dinnanogan. Inakseptar ni Torre ti karit ni Duterte ket inorganisarna a kas charity event ti boxing match tapno makaur-orda pay iti pondo a maited kadagiti biktima ti layus iti Metro Manila ken Luzon. (Ivy Tejano/MANILA BULLETIN)
