Iti laksid ti desision ti Korte Suprema a nangideklarar a maikontra iti konstitusion ti articles of impeachment kontra ken ni Bise Presidente Sara Duterte, patien ti dadduma a senador a mabalin pay laeng nga ituloy ti Senado ti impeachment trial.
Impasingked ni Senador Vicente “Tito” Sotto III nga adda bileg ti Senado a mangaramid iti daytoy agsipud ta kas co-equal branch ti gobierno, saan a makasakup ti judiciary kadagiti trabaho ti sanga ti lehislatibo.
“Gapu ta kamengak ti impeachment court, amanng a kaykayatko a mangngeg no ania ti ibaga ti Kamara,” kinuna ni Sotto.
“Imbaga kaniak ti maysa a legal luminary nga iti daytoy a kasasaad, mabalintayo a di ikankano ti desision ti Korte Suprema gapu ta pakibianganna ti trabaho ti Senado, a naisina iti trabahoda,” kinuna ti dati a lider ti Senado.
Kiddaw ni Duterte a nayon a report ti medical expert, saan a pinatgan ti ICC
Kasta met laeng ti inyebkas ni Senador Paolo “Bam” Aquino IV: “Mamatiak unay a rumbeng nga agtultuloy ti impeachment trial.”
“Kas co-equal branch, nalawag ti konstitusional a mandato ken bileg ti Senado, isu a rumbeng a maraem ti proseso ti impeachment,” kinuna ni Aquino.
“Kiddawek kadagiti padak a senador ti madagdagus a pannakaangay ti caucus tapno pagsasaritaanmi ti desision a di nangikabkabilangan iti pagrebbenganmi iti Konstitusion,” innayonna.
Kinuna pay ni Senador Francis “Kiko” Pangilinan a nupay narikut a komentaran iti nasao a banag a buyogen ti kinasigurado, napaliiwna a kasla nalipatan ti Korte Suprema a co-equal branch-na ti Senado.
“Narigat ti agkomentar a sigsigurado ta diak pay nabasa ti desision ngem panagkunak kas man inlaksid ti Korte Suprema ti legal a prinsipio ti presumption of regularity dagiti aramid ti co-equal,” inlawlawag ni Pangilinan.
“Nagsaon ti Korte Suprema ket masapul a maraem dayta. Ngem pampanunotek laeng no kastoy kadi ngata latta ti desision ti Korte Suprema no sinurot ti Senado ti mandato ti Konstitusion a ‘to forthwith proceed with trial’ (insegida a maangay ti panagbista) yantangay awan ti restraining order nga inruar ti Korte Suprema idi naipila ti petision idi Pebrero?” sinaludsodna.
Kinuna met ni Senador Joel Villanueva a patienna nga ituloy ti impeachment court ti bista “inaramid man ti Korte Suprema dayta a desision wenno saan.”
Kabayatanna, kinuna ni Senador Risa Hontiveros a naldaangan iti desision ti Korte Suprema, a kunana a mabalin a mangpataud iti ababa ken napaut a pagbanagan.
“Maysa kadagiti banag a pampanunotenmi ket no kasano kadi a nalabsing ti “one year bar rule” ta maysa laeng met a kaso ti naipan iti Senado, segun iti mismo a bukod a desision ti Korte Suprema iti Gutierrez vs. House of Representatives (G.R. No. 193459),” kinunana.
"Kas inlawlawag ti Korte Suprema iti dayta a desisionda idi, ti nalawag a konsiderasion iti likudan ti one year bar rule ket mangdakdakamat iti elemento ti panawen, ket saan nga iti bilang ti complaints,” innayonna. (Hannah L. Torregoza/MANILA BULLETIN)
