Segun ken ni 4Ps Party-list Rep. Marcelino "Nonoy" Libanan, lead prosecutor ti Kamara iti kaso ti impeachment ni Bise Presidente Sara Duterte, teknikal a rason ti panangwaswas ti Korte Suprema iti impeachment complaint.
"Ti unanimous decision ti Korte Suprema a mangpasardeng iti impeachment proceedings kontra ken ni Bise Presidente Sara Duterte--maibatay iti constitutional one-year bar on multiple complaints--ket ipaganetgetna a kasapulan a mapatibker ken malawlawagan dagiti wagastayo iti impeachment," kinuna ni Libanan iti maysa a waragawag idi Biernes, Hulio 25.
"Kas maysa a kameng ti Kamara ken ti impeachment prosecution panel, naan-anay ti panangraemko ti pangngeddeng ti Korte. Nupay kasta, naapateg nga ipaganetget a ti desision ket agsaad iti procedural grounds ken saanna sagiden iti merito dagiti alegasion," kinunana.
"Saan a naiwaksi ti accountability iti serbisio publiko--naitantan laeng," impaganetget ti beterano a kongresista.
Senado, pinasingkedanna ti ₱6.793-trilion a nailian a badiet para 2026
Segun kenkuana, "makatulong ti nalawlawag a procedural safeguards a mangsigurado a dagiti konstitusional a mekanismo para iti accountability ket saan la a maraem ngem epektibo pay ken naandur iti sango dagiti politikal a karit."
"Pinalagipannatayo ti kangatuan a korte nga uray kadagiti sensitibo a politikal a bambanag, masapul nga agturay ti due process. Kas kuna ti Korte: 'Adda umisu a wagas a mangaramid ti umisu a banag iti umisu a panawen,'" kinunana. (Ellson Quismorio/MB)
