Nangabak ti hepe ti Philippine National Police (PNP) a ni Gen. Nicolas Torre III idi Domingo, Hulio 27, babaen ti default, iti charity boxing match-da ken ni acting Davao City Mayor Sebastian “Baste” Duterte, a saan a nagparang.
Nakaur-or ti laban iti nasurok a ₱20 a milion iti cash donations ken ticket sales.
Babaen ti kanta a “Eye of the Tiger” kas background, nagdiaging ni Torre nga agturong iti boxing ring a naipasdek iti uneg ti Rizal Memorial Coliseum iti Manila kalpasan ti uppat nga undercard fight a nakairamanan dagiti boksingero manipud iti PNP Boxing Team.
Naruay ti tattao a napan nagbuya iti masegseggaan la unay a laban. Immuli iti ring ni Torre ket inurayda nga agparang ti kalabanna. Inyawag ti ring announcer ti countdown tapno agparang ni Duterte.
DOH, namakdaar iti posible a pannakadangran iti Traslacion
“Sika ti nangabak, Heneral Nicolas Torre III!,” indeklarar ti ring announcer kalpasan a nagpatingga ti panangbilangna tapno agparang ti kalaban ti heneral.
Kinuna ni Torre a nakaawaten ti PNP iti agarup ₱16.3 a milion a cash donations manipud kadagiti nadumaduma nga sponsor.
Segun pay ken ni Torre, dua a tonelada met a relief goods ti naidonar iti PNP kas suporta iti charity boxing match, nga aggatad iti agarup ₱4.2 a milion. Nakapataud met ti panaglako iti tiket iti agarup ₱350,000.
“Idonarmi amin a naur-or kadagiti amin a kailiantayo a naapektaran ti bagyo. Kinapudnona, mapankami iti Baseco (Manila) mangitulod iti tulong,” kinuna ni Torre, sana innayon a maidalan dagiti donasion babaen dagiti ahensia ken organisasion kas iti Department of Social Welfare and Development ken Philippine Red Cross.
Nangrugi nga agsagana ti kampo ni Torre para iti laban kalpasan a nangiruar ni Duterte iti statement a mangikalikagum a makilaban laeng no agpa-drug test ni Presidente Ferdinand R. Marcos Jr. ken amin a nabotosan nga opisial.
“Umuna iti amin, dakami laeng met a dua ti nairaman ditoy. No hair follicle test ti kasapulan para kadakami a dua, mabalin dayta iti ania man nga oras, iti sadino man. Nakitayo met no kasano nga ingganetgetmi ken no kasano a bannogmi a nangisayangkat iti daytoy ket panagkunak saan a maikari a sungbatan isuna iti kondisionna iti daytoy a punto. Bay-antayo latta isunan iti bukodna a lubong iti agdama,” kinuna ni Torre kadagiti reporter.
Ni Duterte ti nangkarit nga agdinnanoganda ken ni Torre iti maysa kadagiti podcast-na--nga inawat met ti hepe ti PNP ket kinunana a rumbeng a mapagbalin daytoy a charity boxing match para iti pagimbagan dagiti biktima ti kalamidad.
Idi rinugian ni Baste ti nagrason ket nagkiddaw iti kuna dagiti agpalplaiiw nga "imposible a kalikagum," narikna ni Torre a saan a talaga nga interesado a makiranget ni Duterte.
Nangiruar pay ni Duterte iti sabali nga statement a sanguenna ni Torre iti nagbaetan ti Martes agingga iti Biernes (Hulio 29-Agosto 1) ita a lawas.
Ngem saanen nga interesado ni Torre.
"Naibagatayo aminen isu a daytoy laengen ti maysa ken kakaisuna a gundaway a pagarupek nga ipangagtayo pay isuna. Awannan. Adu la unay metten dagiti kondisionna. Saan a kasta, no sika ti mangkarit, uray ania pay mapaspasamak, (takderam), uray ti maysa nga ubing, ammona dayta. No sika a mismo ti mangkarit, masapul a takderam ti karitmo. No dimo matakderan, isardengmo laengen,” kinuna ti heneral.
Kinuna pay ni Torre a masapul a maituloy ti nasao nga aktibidad yantangay addan dagiti isponsor a nagkumiten iti cash ken goods donations.
Mairaman kadagiti timmabuno da Department of the Interior ken Local Government (DILG) Secretary Jonvic Remulla, National Police Commission (Napolcom) Vice Chairman Raphael Calinisan, ken dagiti nangangato nga opisial ti PNP. (Christopher Lloyd Caliwan/PNA)
